काठमाडौँ, ७ मङ्सिर — खानेपानीमन्त्री प्रदीप यादवले गत असोजमा परेको बाढीपहिरोका कारण क्षति भएका १,६१६ खानेपानी आयोजनाको मर्मत छिटो सम्पन्न गर्न निर्देशन दिनुभएको छ। बाढीले रु ६ अर्बभन्दा बढीको क्षति पुर्याएर २५ लाख जनसङ्ख्यालाई प्रत्यक्ष रूपमा प्रभावित पारेको छ।
मन्त्री यादवले अस्थायी मर्मत तथा पुनर्निर्माणमार्फत पानी आपूर्ति पुन: सञ्चालन गर्न तत्काल प्राविधिक सहयोग र स्रोत साधन परिचालन गर्न आग्रह गर्नुभएको छ। साथै, क्षतिग्रस्त आयोजनाको पुनर्निर्माणका लागि बजेटको व्यवस्था गरिने जानकारी दिनुभयो।
सबैभन्दा बढी क्षति काठमाडौँ, ललितपुर, काभ्रे, सिन्धुपाल्चोक, र सुनसरीलगायत जिल्लामा पुगेको छ। काठमाडौँ उपत्यका खानेपानी लिमिटेड (केयूकेएल)लाई मात्र रु १ अर्ब क्षति पुगेको छ भने काभ्रेको तेमाल खानेपानी आयोजनामा रु १० करोडको क्षति भएको छ।
मन्त्रालयका अनुसार बाढीले इन्टेक, पाइपलाइन, पानी ट्याङ्की, र प्रशोधन प्लान्टलगायत संरचनामा गम्भीर प्रभाव पारेको छ।
