कम्प्युटर एसोसिएसन नेपाल महासंघ (क्यान महासंघ) जिल्ला शाखा सिरहाको १५औं साधारण सभा तथा ७औं अधिवेशन भव्य रूपमा सम्पन्न भएको छ। निबर्तमान अध्यक्ष संजय कुमार शर्मा ठाकुरको अध्यक्षतामा लहानमा सम्पन्न कार्यक्रममा नगर प्रमुख महेश प्रसाद चौधरी प्रमुख अतिथि रहनु भएको थियो।
कार्यक्रमलाई सम्बोधन गर्दै नगर प्रमुख चौधरीले सूचना प्रविधिको महत्वमा जोड दिँदै आधुनिक युगलाई प्रविधिको युगका रूपमा परिभाषित गरे। “प्रविधिको सहायताबिना हाम्रो जीवन सहज हुन सक्दैन,” चौधरीले भने। उनले नगरपालिकाले युवाहरुलाई रोजगारी सिर्जना गर्न क्यान महासंघसँग सहकार्य गर्न तत्पर रहेको बताए।
कार्यक्रममा स्थापना कालदेखि क्यान महासंघ सिरहाको प्रगतिको यात्राबारे जानकारी गराउँदै संस्थापक अध्यक्ष दीपेन्द्रराज सिंहले प्रविधिमा आधारित शिक्षा र तालिमले समाजलाई अघि बढाउन महत्त्वपूर्ण भूमिका खेल्ने बताए।
अधिवेशनले नन्दकिशोर गुप्तालाई अध्यक्ष चयन गरेको छ। अन्य पदाधिकारीमा उपाध्यक्ष दीपेन्द्र महतो, सचिव सुरेन्द्र कुमार महतो, कोषाध्यक्ष सुनैना कुमारी सिंह कुशवाह र सहसचिव घुरन महतो निर्वाचित भएका छन्। सदस्यहरुमा सन्तोषी कुमारी यादव, सन्तोष कुमार गुप्ता, मनोज कुमार यादव, भगवानलाल चौधरी र कुमोद कुमार यादव चयन भएका छन्।
कार्यक्रममा मधेस प्रदेशका अध्यक्ष धन्नजे महतोले साइबर सुरक्षा र प्रविधि शिक्षामा केन्द्रित तालिमलाई विस्तार गर्न आफू प्रतिबद्ध रहेको बताए। यसैगरी, केन्द्रिय सचिव भुपाल दास श्रेष्ठले सिरहालाई सूचना प्रविधिमा उत्कृष्ट बनाउन आवश्यक योजनाहरु अघि सार्ने बताएका छन्।
कार्यक्रमको अन्त्यमा खुला र बन्द सत्र गरी सदस्यहरुको उल्लेखनीय उपस्थिति बीच अधिवेशन सम्पन्न भएको थियो।
