गोरखा ।गोरखा नगरपालिका–५ को वडाध्यक्ष पदका लागि भएको उपनिर्वाचनमा प्रारम्भिक मतगणनाले नेकपा माओवादी केन्द्रका उम्मेदवार विष्णु रानाले अग्रता लिएका छन्। हालसम्म ६०० मत गणना सम्पन्न भएको छ।
प्राप्त जानकारीअनुसार रानाले २०८ मत प्राप्त गरी अग्रस्थान कायम गरेका छन् भने नेपाली कांग्रेसका उम्मेदवार भाइकाजी आले १८४ मतसहित दोस्रो स्थानमा छन्। तेस्रो स्थानमा रहेका नेकपा एमालेकी उम्मेदवार दुर्गामाया रानाले १५४ मत पाएकी छिन्। राष्ट्रिय स्वतन्त्र पार्टीका उम्मेदवार मंगलबहादुर थापाले भने ३२ मत पाएका छन्।
गोरखा–५ मा वडाध्यक्ष पदका लागि नौ जना उम्मेदवार चुनावी प्रतिस्पर्धामा छन्। आइतबार बिहान ७ बजेदेखि साँझ ५ बजेसम्म भएको मतदानमा कुल २,२२५ मतदातामध्ये १,३७३ जनाले मतदान गरेका थिए।
प्रारम्भिक मतगणनाको नतिजाले मुख्य प्रतिस्पर्धा माओवादी, कांग्रेस र एमालेबीच हुने संकेत गरेको छ। अब बाँकी मतगणनाले कसले वडाध्यक्षको पद जित्ने छ भन्ने तय गर्नेछ।
