काठमाडौँ, १४ पुस – नेपाली कांग्रेसका सभापति एवं पूर्वप्रधानमन्त्री शेरबहादुर देउवाले खेलकुद स्वस्थ शरीरका लागि अनिवार्य रहेको बताउनुभएको छ। उहाँले स्वस्थ शरीरमा स्वस्थ दिमागको आवश्यकता हुने र यसका लागि खेलकुदको भूमिका महत्त्वपूर्ण रहेको औँल्याउनुभयो।
नेपाल लोकतान्त्रिक खेलकुद सङ्घ महाधिवेशन केन्द्रीय समितिद्वारा आयोजित प्रजातान्त्रवादी खेलाडी तथा खेलप्रेमीहरुको राष्ट्रिय भेलाको उद्घाटन गर्दै उहाँले खेलकुद क्षेत्रमा युवाहरुको सक्रिय सहभागिता रहने हुँदा यसले उनीहरुको व्यक्तिगत र व्यावसायिक विकासमा ठूलो योगदान पुर्याउने विचार व्यक्त गर्नुभयो। साथै, उहाँले पार्टीले युवा र खेलकुदका विषयलाई प्राथमिकतामा राखेको स्पष्ट पार्दै देशभर सञ्चालन हुँदै आएको राष्ट्रपति रनिङ शिल्डलाई प्रभावकारी ढङ्गले निरन्तरता दिनुपर्नेमा जोड दिनुभयो।
कार्यक्रममा युवा तथा खेलकुदमन्त्री तेजुलाल चौधरीले खेलकुद अनुशासनको महत्त्वप्रति बल दिँदै, नियम तोड्ने खेल सङ्घहरुलाई कारबाही गरिने चेतावनी दिनुभयो। उहाँले खेलाडीका परिवारका लागि शैक्षिक सहयोगसम्बन्धी व्यवस्था आगामी आर्थिक वर्षको बजेटमा गर्ने विषयमा छलफल भइरहेको जानकारी दिनुभयो।
नेपाल लोकतान्त्रिक खेलकुद सङ्घका संयोजक मोहनबहादुर बस्नेतले सङ्घको महाधिवेशन आगामी चैत मसान्तभित्र सम्पन्न गर्ने तयारीमा रहेको र ‘सभापति कप फुटबल प्रतियोगिता’को आयोजना गर्ने योजना रहेको जानकारी गराउनुभयो।
त्यसैगरी, सङ्घका अध्यक्ष देवेन्द्रकुमार शेरचनले खेलकुद क्षेत्रका विकृति र विसङ्गति हटाउन सङ्घले आवश्यक कदम चाल्ने प्रतिबद्धता व्यक्त गर्नुभयो।
उक्त कार्यक्रममा नेपाली कांग्रेसका नेताहरु, सङ्घका जिल्ला अध्यक्षहरु र विभिन्न खेलकुद सङ्घका पदाधिकारीहरुको उपस्थिति थियो।
