काठमाडौं – संघीय संसद् अन्तर्गत प्रतिनिधि सभाको पाँचौं अधिवेशनको ११औँ बैठक सोमबार दिउँसो १ बजे बस्दैछ।
आजको बैठकमा प्रधानमन्त्री केपी शर्मा ओलीले “अख्तियार दुरुपयोग अनुसन्धान आयोगको चौतीसौँ वार्षिक प्रतिवेदन (आ.व. २०८०/०८१)” पेस गर्ने कार्यसूची रहेको छ।
त्यस्तै, गृहमन्त्री रमेश लेखकले “सशस्त्र प्रहरी बल, नेपाल विधेयक, २०८१” माथि विचार गरियोस् भन्ने प्रस्ताव प्रस्तुत गर्नेछन्।
स्वास्थ्य सेवासँग सम्बन्धित विषयमा सांसद शेर बहादुर कुँवरले सुदूरपश्चिम र कर्णाली प्रदेशका विपन्न नागरिकहरूलाई अस्पतालबाट प्रदान गरिने निःशुल्क सेवाको निरन्तरता आवश्यक रहेको भन्दै स्वास्थ्य तथा जनसंख्या मन्त्रीको ध्यानाकर्षण गराउने छन्। उक्त प्रस्तावमाथि सांसद दयाल बहादुर शाही र पुष्प बहादुर शाहले स्पष्टीकरण माग गर्ने कार्यसूची रहेको छ।
यसैगरी, सांसद राजेन्द्र बजगाईंले “नेपालका ग्रामीण क्षेत्रमा बाँदर र जङ्गली सुँगुरको आतङ्कले किसानहरूलाई पारेको क्षति तथा दीर्घकालीन समाधानका लागि नीति निर्माण र कार्यान्वयनको आवश्यकता” सम्बन्धी जरुरी सार्वजनिक महत्वको प्रस्ताव प्रस्तुत गर्नेछन्। उक्त प्रस्तावलाई सांसद उदय शमशेर ज.ब.रा. र सञ्जय कुमार गौतमले समर्थन गर्ने छन्।
बैठकका एजेन्डाहरूबारे महासचिव पद्म प्रसाद पाण्डेयले जानकारी दिएका छन्।
