महेश सिंह लहान – सिरहाको नवराजपुर गाउँपालिका–४, नहरनियाँमा सर्पदंश उपचार केन्द्र सञ्चालनमा आएको छ। समाजसेवी राम औतार यादव र उनकी श्रीमती गंगिया यादवले करीब १० कठ्ठा (झण्डै १० करोड रुपैयाँ बराबरको) जग्गा प्रदान गरेपछि यो सेवा सुरु गरिएको हो।
पालिका अध्यक्ष शिव उदघार यादव र जग्गा दाता यादवले हिन्दू परम्परा अनुसार पूजापाठ गरी उपचार केन्द्रको औपचारिक उद्घाटन गरेका छन्।
पालिका अध्यक्ष यादवका अनुसार सिरहाको १७ वटा स्थानीय तहमध्ये पहिलो पटक नवराजपुर गाउँपालिकाले सर्पदंश उपचार सेवा उपलब्ध गराएको हो। नेपालका विभिन्न जिल्लासँगै छिमेकी भारतको बिहारका नागरिकहरूले समेत यो सेवा लिन सक्ने बताइएको छ।
सर्पदंशको जोखिम न्यूनीकरण गर्न नवराजपुर गाउँपालिकाले व्यापक सचेतना अभियान समेत सञ्चालन गरेको छ। पालिका कार्यालय, प्राथमिक स्वास्थ्य केन्द्र र सर्पदंश उपचार केन्द्रको संयुक्त प्रयासमा जनचेतनामूलक पोस्टर टाँस्ने, जनप्रतिनिधि र स्वास्थ्यकर्मीमार्फत जानकारी गराउने जस्ता कार्यक्रम अघि बढाइएको छ।
गाउँपालिकाले नागरिकहरूलाई निम्न उपायहरू अवलम्बन गर्न आग्रह गरेको छः
राति हिँड्दा टर्चलाइटको प्रयोग गर्ने।
खुला खुट्टा हिँड्ने बानी त्यागी जुत्ता वा गमबुट लगाउने। घर वरपर झारपात सफा राख्ने।
खेतबारीमा अत्यधिक बाक्लो बाली नलगाउने।
सुतेको ठाउँ सफा राख्ने र अनिवार्य रूपमा झुल प्रयोग गर्ने।
सर्प देखे टाढा रहने र अनावश्यक रुपमा नछुने।
पालिकाले सर्पदंश उपचार केन्द्र स्थापनासँगै नागरिकको स्वास्थ्य सुरक्षामा ठूलो योगदान पुर्याएको विश्वास गरिएको छ।
