महेश सिंह लहान – सिरहाको नवराजपुर गाउँपालिका–१ का रिंकु सदा को निधनपछि उनको परिवार शोकमा डुबेको छ। परिवारमा आमाबुवा सहित दुई साना भाइहरू छन्, जसको आर्थिक अवस्था अत्यन्त नाजुक छ।
सोही कारण, समग्र जनउत्थान केन्द्र लहान र केयर नेपाल को साझेदारीमा सञ्चालित सहास परियोजना अन्तर्गतको कुइक रिस्पोन्स टिम र समग्र जनउत्थान केन्द्र लहान को टोली शनिबार मृतकका परिवारलाई भेट्न पुगेको हो। टोलीले परिवारलाई भावनात्मक सहारा दिने प्रयास गर्दै खाद्य सामग्री पनि सहयोग गरेको छ।
अनुगमन टोलीमा कुइक रिस्पोन्स टिमकी सदस्य सकुन् चौधरी, सहास परियोजना अधिकृत अकेशा चौधरी, समग्र जनउत्थान केन्द्र लहानकी उपाध्यक्ष अनिता चौधरी नेपाल बिबिसी अन्लाईनका पत्रकार महेश सिंह लगायतका सामाजिक अभियन्ताहरू सहभागी थिए।
टोलीले मृतकका बाबु बिजुल सदा र आमा सीता देवी सदा लाई भेटेर उनीहरूको अवस्था बुझेको थियो। छोरो गुमाएपछि उनीहरू शोकमग्न छन् भने दुई साना छोराहरूको भविष्य अन्योलमा परेको छ।
सहयोगी टोलीले परिवारलाई तत्काल राहतस्वरूप खाद्य सामग्री हस्तान्तरण गरेको छ। टोलीका अनुसार, आगामी दिनमा पनि आवश्यक सहयोग तथा मनोवैज्ञानिक परामर्श प्रदान गर्ने योजना रहेको छ।
सहास परियोजनाले संकटग्रस्त परिवारहरूको सहयोगका लागि समुदायमै पुगेर सहयोग गर्ने नीति लिएको छ। स्थानीय सरकार, अन्य संघसंस्था तथा समुदायले पनि यस्ता परिवारहरूको उद्धारमा हातेमालो गर्नुपर्ने टोलीको भनाइ छ।
