प्रदिप सिंह
लहान १ चैत– होली पर्वको अवसरमा सिरहा जिल्लामा ट्राफिक प्रहरी कार्यालयले १३९ सवारीसाधनलाई ट्राफिक नियम उल्लङ्घन गरेको आरोपमा कारबाही गरेको छ। यसमा १३७ वटा मोटरसाइकल र २ वटा चारपांग्रे गाडी समावेश छन्। कारबाहीमा परेका चालकहरूमध्ये १७ जनाले मादक पदार्थ सेवन गरेर सवारी चलाएका थिए भने ७१ जना चालकले हेल्मेट नलगाएको कारण कारबाहीमा परेका छन्।
अन्य ५१ सवारीसाधनलाई विभिन्न कारणले कारबाही गरिएको छ, जसमा चालकसँग बुलबुक नहुनु र लापरवाही देखिनु समावेश छ।
जिल्ला ट्राफिक कार्यालय, लहान सिरहाका प्रमुख पोषणराज थपलियाले जानकारी दिए अनुसार, २२ चालकले आफ्नो मोटरसाइकल फिर्ता लिइसकेका छन् भने ११६ वटा सवारीसाधन अझै ट्राफिक कार्यालयमा राखिएका छन्।
ट्राफिक प्रहरी कार्यालयले सबैलाई ट्राफिक नियम पालना गर्न र सुरक्षित यात्रा गर्न आग्रह गर्दै मादक पदार्थ सेवन गरेर सवारी नचलाउन, हेल्मेट लगाउन र अन्य नियमहरूको कडाइका साथ पालन गर्न अनुरोध गरेको छ।
