काठमाडौं – राष्ट्रपति रामचन्द्र पौडेलले यही आउँदो शुक्रवार, वैशाख १९ गते संघीय संसदको दुवै सदनको संयुक्त बैठकलाई सम्बोधन गर्ने भएका छन्। सम्बोधन कार्यक्रम दिउँसो ३ बजेका लागि तय गरिएको छ।
प्रतिनिधि सभाका सभामुख देवराज घिमिरेले मंगलवारको बैठकमा राष्ट्रपति कार्यालयबाट प्राप्त पत्र सार्वजनिक गर्दै उक्त जानकारी गराएका हुन्। उनले नेपालको संविधानको धारा ९५ अनुसार राष्ट्रपतिको सम्बोधन हुने प्रावधान उल्लेख गर्दै, सम्पूर्ण सांसदलाई समयमै उपस्थित भइ आसनग्रहण गर्न आग्रह गरे।
सभामुख घिमिरेका अनुसार सम्बोधन कार्यक्रममा भाग लिन प्रतिनिधि सभाका सबै सदस्यले पौने ३ बजेभित्र आफ्नो आसनमा बसिसक्नुपर्नेछ। उनले भने, “सम्माननीय राष्ट्रपति श्री रामचन्द्र पौडेलज्यूबाट नेपाल सरकार मन्त्रीपरिषद्को सिफारिसमा वैशाख १९ गते दिनको ३ बजे सम्बोधन हुने भएकाले त्यसअनुसार उपस्थितिका लागि आह्वान गरिएको छ।”
यसका साथै, सम्बोधनका दिन सांसदहरूले निर्धारित पोशाकमा उपस्थित हुनुपर्ने समेत सभामुखले स्पष्ट पारेका छन्। संसद सचिवालयले सम्बोधनलाई विशेष महत्व दिँदै तयारीमा जुटेको छ।
