महेश सिंह सिरहा- धनगढीमाई नगरपालिका–११, छपरारीमा संगीतमय श्रीमद्भागवत सप्ताह ज्ञान महायज्ञ सुरु भएको छ। धार्मिक वातावरणले आस्थामा नयाँ उर्जा भरेको यस कार्यक्रममा हजारौं भक्तजनको उल्लेखनीय उपस्थिति देखिएको छ।
बिरेन्द्र कुमार महतो र कल्याण महतोको आयोजनामा सुरु भएको साताव्यापी महोत्सवमा पण्डित विष्णु शरण पाण्डेयले कथा वाचन गरिरहेका छन्। पहिलो दिन श्री नारद चरित्र र गोकरण चरित्र प्रस्तुत गरिएको छ।
आयोजकका अनुसार दोस्रो दिन सुकदेव जन्म, परीक्षित जन्म, कुन्ती चरित्र, भीष्म स्तुति र वराह अवतार; तेस्रो दिन कपिल उपाख्यान, ध्रुव अवतार, भरत चरित्र, प्रह्लादावतार र नरसिंह अवतारको चर्चा गरिनेछ। चौथो दिन समुद्र मन्थन, वामन अवतार, श्रीराम जन्मोत्सव र श्रीकृष्ण जन्मोत्सव नन्द उत्सवका प्रसंग सुनाइनेछन्।
त्यस्तै, पाँचौँ दिन माखन चोरी, नामकरण, बीज होली, गोवर्धन पूजा; छैटौँ दिन गोपी गीत, महारास, कंस वध, उद्धव प्रसंग, रुक्मिणी विवाह र सातौँ दिन श्रीकृष्ण विवाह, सुदामा चरित्र लगायत प्रसंग वाचन हुनेछ। कार्यक्रमको अन्त्यमा अष्टयाम शुभारम्भ, पूर्णाहुति अष्टयाम र विशाल प्रीतिभोज तथा भण्डारा आयोजना गरिनेछ।
कार्यक्रममा सहभागी मानव अधिकारकर्मी, पत्रकार, सुरक्षा कर्मी लगायत विभिन्न क्षेत्रका व्यक्तित्वलाई सम्मान गरिएको छ। “समानित हुन पाउँदा गौरव महसुस गरें,” वरिष्ठ महिला अधिकारकर्मी रिता महतोले भनिन्।
आयोजक समितिका प्रतिनिधि पपु कुमार सिंहका अनुसार धार्मिक कथाले समाजमा रहेका विकृति हटाउन, धार्मिक सहिष्णुता कायम राख्न र शान्ति, अमनचयन प्रवर्द्धन गर्न सघाउने विश्वास लिएको बताए।
“धार्मिक कथा सुनेर जीवनमा सकारात्मक परिवर्तन ल्याउन सकिन्छ,” सहभागी बिभा कुमारी महतोले भनिन्। आयोजक बिरेन्द्र कुमार महतोले सबैलाई कार्यक्रममा सहभागिता जनाई धर्म लाभ लिन आग्रह गरे।
