विद्यालय सौन्दर्यीकरणमा प्रधानाध्यापकको पहल

महेश सिंह सिरहा- जनता माध्यमिक विद्यालय बेतहा भवानीपुरका प्रधानाध्यापक रामबिलास यादवको पहलमा विद्यालय परिसर सौन्दर्यीकरण अभियान सुरु गरिएको छ। फूलवारी गोडमेल गर्दै नर्सरीबाट ल्याइएका विभिन्न प्रजातिका नयाँ फूल रोपेर विद्यालयलाई आकर्षक बनाउन कार्य अघि बढाइएको हो।
विद्यालयको शैक्षिकस्तर उन्नतिका लागि निरन्तर चिन्तित रहेका यादवले भौतिक वातावरणसँगै शिक्षा सुधारलाई पनि समान महत्त्व दिँदै आएका छन्। स्थानीय अभिभावकका अनुसार उनले संस्कारसहितको शिक्षा र सिपमूलक शिक्षामा जोड दिँदै विद्यालयलाई अनुकरणीय बनाउन योगदान पुर्‍याएका छन्।
सो अभियानमा विद्यालय व्यवस्थापन समितिका सदस्य जितन साह, विद्यालयका शिक्षक–कर्मचारी तथा बालक्लबका विद्यार्थीहरूको सक्रिय सहभागिता रहेको विद्यालयले जनाएको छ।

ADVERTISEMENT

ADVERTISEMENT

ADVERTISEMENT