महेश सिंह लहान — विद्यालय बाहिर रहेका किशोरीहरूलाई पुनः शिक्षामा जोड्ने उद्देश्यसहित SAGE/ALP (Adolescent Girls’ Education) कार्यक्रम सिरहाको लहानमा औपचारिक रूपमा सुरु गरिएको छ।
समग्र जन उत्थान केन्द्र, लहान सिरहा र युनिसेफको साझेदारीमा सञ्चालित यो कार्यक्रम २०८२ साल कार्तिक १७ गते लहानमा आयोजित परिचयात्मक कार्यक्रममार्फत प्रारम्भ गरिएको हो।
परियोजनाको लक्ष्य विद्यालय शिक्षाबाट वञ्चित किशोरीहरूलाई वैकल्पिक सिकाइका माध्यमबाट पुनः औपचारिक शिक्षामा लैजाने र उनीहरूको जीवन कौशल सुदृढ बनाउने रहेको छ।
कार्यक्रम सिरहा जिल्लाका कर्जन्हा, गोलबजार, कल्याणपुर, सिरहा नगरपालिका र नवराजपुर गाउँपालिका, साथै महोत्तरी जिल्लाका भङ्गहा, मनरासिस्वा नगरपालिका र एकडारा गाउँपालिकामा सञ्चालन हुँदैछ।
परिचयात्मक कार्यक्रममा सामुदायिक सिकाइ केन्द्रका प्रतिनिधि, शिक्षा शाखा प्रमुख, प्रमुख प्रशासकीय अधिकृत, नगर प्रमुखलगायतका अधिकारीहरूको सहभागिता रहेको थियो। सहभागीहरूले यो पहलले किशोरीहरूको शिक्षामा पहुँच र आत्मविश्वास बढाउने अपेक्षा व्यक्त गरेका छन्।
कार्यक्रमका एक सहभागीले भने, “शिक्षाबाट टाढा परेका किशोरीहरूलाई पुनः सिकाइको यात्रामा ल्याउनु नै यो कार्यक्रमको सबभन्दा ठूलो उपलब्धि हुनेछ।”
विशेषज्ञहरूका अनुसार सिरहा र महोत्तरीजस्ता जिल्लामा किशोरी शिक्षाको पहुँच अझै सीमित छ, र यस किसिमका कार्यक्रमहरूले स्थानीय तहमा ठोस परिवर्तन ल्याउन सक्छन्।
