महेश सिंह लहान सिरहा –हालै सिरहा जिल्लामा जिम्मेवारी सम्हाल्न आएका प्रमुख जिल्ला अधिकारी सुरेन्द्र पौडेललाई विभिन्न पक्षबाट सम्मान गरिएको छ। जिल्ला प्रशासनको जिम्मेवारी सम्हालेपछि पौडेलले जनताको अपेक्षा बुझ्ने र विकासका प्राथमिक क्षेत्रहरूमा सक्रिय रूपमा काम गर्ने प्रतिबद्धता जनाएका छन्।
उनले लहानस्थित प्रादेशिक अस्पताल पुगेर अस्पतालको अवस्था, सेवा विस्तार र आवश्यक सुधारका विषयमा अस्पताल समितिका पदाधिकारीहरूसँग समसामयिक छलफल गरेका छन्। उक्त छलफलमा उनले अस्पताल विकासका लागि निरन्तर सक्रियता देखाउने र सरोकारवालाको सुझावलाई प्राथमिकतामा राख्ने बताएका थिए।
अस्पताल समितिका अध्यक्ष राम नारायण महतोका अनुसार प्रमुख जिल्ला अधिकारी पौडेल जनताको सेवामा उत्तरदायी र सहयोगी स्वभावका अधिकारी हुन्। “उनी नियमित रूपमा अस्पतालका चुनौती र सुधारका उपायहरूबारे सुझाव लिँदै आएका छन्,” महतोले बताए।
जनताको स्वास्थ्य सेवा सुधार र अस्पताल सुदृढीकरणमा निकट भविष्यमा नै ठोस परिणाम देखिने विश्वास व्यक्त गर्दै पौडेलले सिरहावासीको अपेक्षाअनुसार काम गर्न प्रतिबद्धता जनाएका छन्।
