महेश सिंह,सिरहा लहान – कडिँदो जाडोको मौसममा जोखिममा पर्ने समुदायलाई लक्षित गरी पूर्वमन्त्री तेजुलाल चौधरीको आर्थिक सहयोगमा खडक नगरपालिका–३, बनरझुलामा करिब सयौँ अपाङ्ग, अशक्त, असहाय, दलित, आदिवासी, जनजाति तथा मुस्लिम समुदायका व्यक्तिहरूलाई न्यानो ब्लाङ्केट वितरण गरिएको छ।
स्थानीय वरिष्ठ समाजसेवी बिरेन्द्र चौधरीको विशेष पहलमा सञ्चालन गरिएको उक्त राहत अभियानलाई शवल नेपालका प्रतिनिधि राधेश्याम रामले समन्वय गरेका थिए। उनका अनुसार कमजोर तथा पछाडि परेका परिवारलाई तत्काल राहत पुर्याउने उद्देश्यले बस्ती–बस्तीमै पुगेर ब्लाङ्केट वितरण गरिएको हो।
“पूर्वमन्त्री चौधरीको आर्थिक सहयोग र स्थानीय समाजसेवीहरूको सक्रियताले कार्यक्रम प्रभावकारी रूपमा सम्पन्न हुन सक्यो,” समन्वयकर्ता रामले बताए। राहत प्राप्त गरेका सेवाग्राहीहरूले जाडोमा ठूलो सुरक्षा पाएको भन्दै खुसीसाथ आभार व्यक्त गरेका थिए।
कार्यक्रमका प्रमुख अतिथि पूर्वमन्त्री तेजुलाल चौधरीले समाजमा अपाङ्गता भएका व्यक्तिहरूलाई हेप्ने प्रवृत्ति आज पनि नरहेको बताए। “अपाङ्गता भएकाहरू पनि मानव हुन्, उनीहरूमा छुट्टै क्षमता, कला र विशेष प्रतिभा हुन्छ,” उनले भने। राज्यले यस्ता व्यक्तिहरूलाई विशेष प्राथमिकतामा राखेर व्यवहारिक सहयोग तथा सम्मानजनक वातावरण सुनिश्चित गर्नुपर्नेमा उनले जोड दिए।
बनरझुलामा सम्पन्न यो कार्यक्रमलाई स्थानीयबासी र सामाजिक अभियन्ताहरूले मानवीय संवेदनशीलता, सामाजिक उत्तरदायित्व र समावेशी समाज निर्माणतर्फको महत्वपूर्ण कदमका रूपमा स्वागत गरेका छन्।
