महेश सिंह | सिरहा –सिरहाको नवराजपुर गाउँपालिका–३, जगतपुर मा विश्व हिन्दू परिषद नेपालको सहकार्य, वडा कार्यालयको समन्वय तथा बालासुन्दरी आई केयर सेन्टर प्रा.लि. को आयोजनामा सञ्चालन गरिएको निःशुल्क आँखा शिविरबाट २ सय जना स्थानीय लाभान्वित भएका छन्।
वडा अध्यक्ष बनसिलाल यादवको अध्यक्षतामा सम्पन्न शिविर उद्घाटन कार्यक्रममा विश्व हिन्दू परिषद नेपालका सिरहा जिल्ला अध्यक्ष शिवदेव साह, शिवराम यादव, बालासुन्दरी आई केयर सेन्टर प्रा.लि.का सञ्चालक ज्ञानेन्द्र विक्रम यादव, प्रेमशिला यादव, सान्ता चौधरी तथा सञ्चालक समितिका अन्य पदाधिकारीहरूको उपस्थिति रहेको आयोजकले जनाएको छ।
शिविरमा दक्ष तथा अनुभवी आँखा स्वास्थ्य प्राविधिकद्वारा स्थानीयवासीको निःशुल्क आँखा परीक्षण गरिएको थियो। परीक्षणका क्रममा आँखासम्बन्धी विभिन्न समस्याको पहिचान गर्नुका साथै आवश्यक स्वास्थ्य परामर्श प्रदान गरिएको थियो। जटिल समस्या देखिएका बिरामीलाई थप उपचारका लागि आवश्यक सुझावसमेत दिइएको आयोजकले जनाएको छ।
कार्यक्रमलाई सम्बोधन गर्दै वडा अध्यक्ष बनसिलाल यादवले दृष्टि नै मानव जीवनको सबैभन्दा महत्वपूर्ण सम्पत्ति भएकाले गाउँमै निःशुल्क आँखा परीक्षण सेवा उपलब्ध गराउन पाउँदा आफूलाई अत्यन्त खुसी लागेको बताए। विशेषगरी गरिब, अशक्त, अपाङ्ग, दलित तथा ज्येष्ठ नागरिकले आफ्नै गाउँमा सहज रूपमा स्वास्थ्य सेवा पाउनु स्थानीय सरकारको दायित्व भएको उल्लेख गर्दै उनले “वृद्ध आमाबुबाको सेवा गर्न पाउनु नै सबैभन्दा ठूलो खुसी हो,” भने।
त्यसैगरी विश्व हिन्दू परिषद नेपालका सिरहा जिल्ला अध्यक्ष शिवदेव साहले मानव सेवा नै संसारको सबैभन्दा ठूलो धर्म र उत्कृष्ट सेवा भएको बताउँदै समाजका विपन्न, असहाय तथा स्वास्थ्य सेवाबाट वञ्चित नागरिकसम्म यस्ता सेवामूलक कार्यक्रम निरन्तर सञ्चालन गरिनुपर्नेमा जोड दिए।
बालासुन्दरी आई केयर सेन्टर प्रा.लि.का सञ्चालक ज्ञानेन्द्र विक्रम यादवले ग्रामीण क्षेत्रमा गुणस्तरीय आँखा स्वास्थ्य सेवा सहज रूपमा पुर्याउने उद्देश्यले शिविर सञ्चालन गरिएको बताउँदै आगामी दिनमा पनि यस्ता सामाजिक तथा स्वास्थ्यसम्बन्धी कार्यक्रमलाई निरन्तरता दिइने जानकारी दिए।
आयोजकका अनुसार शिविरबाट २ सय जना स्थानीयले निःशुल्क आँखा परीक्षण सेवा प्राप्त गरेका छन्। ग्रामीण भेगका नागरिकलाई आफ्नै गाउँमा विशेषज्ञ सेवा उपलब्ध गराउने उद्देश्यले सञ्चालन गरिएको यस शिविरले स्थानीयवासीलाई प्रत्यक्ष राहत र स्वास्थ्य लाभ पुगेको विश्वास गरिएको छ।
