बुटवल । जनता समाजवादी पार्टी, नेपालले आगामी मंसिर ४ गते हुन गइरहेको प्रतिनिधि तथा प्रदेशसभा सदस्य निर्वाचनका लागि प्रत्यक्षतर्फ लुम्बिनी प्रदेशमा २९ जनाको उम्मेदवारी दर्ता गरेको छ। संघीय सरकारका भौतिक पूर्वाधार विकास मन्त्री मोहम्मद इस्तियाक राईले पनि जसपाको तर्फबाट बाँकेको क्षेत्र नं. २ बाट उम्मेदवारी दिएका छन्।
सत्ता गठबन्धन छाडेर नेकपा एमालेसँग चुनावी तालमेल गर्न पुगेको जसपाले तराई मधेशका १४ जिल्लाहरूमा चुनावी तालमेल गरेको छ। जसअन्तर्गत लुम्बिनी प्रदेशको नवलपरासी, रूपन्देही र कपिलवस्तुमा चुनावी तालमेल गरी बाँकी जिल्लाहरूमा एकल उम्मेदवारी दिएको जसपाले प्रदेशका ९ जिल्लाहरूमा उम्मेदवारी दर्ता गराएको छ। जसपाको तर्फबाट बर्दिया क्षेत्र नं. १ मा प्रतिनिधिसभाका लागि रेशमबहादुर खत्रीले उम्मेदवारी दिएका छन् भने सोही क्षेत्रको प्रदेशसभातर्फ १(१)मा दिलीप बर्मा र १ (२)मा कृष्ण यादवले उम्मेदवारी दिएका छन्।
त्यस्तै क्षेत्र नं. २ को प्रदेशसभातर्फ २(१) मा शान्ता पौडेल र २(२) मा मोहम्मद नसिब खानले उम्मेदवारी दिएका छन्।
बाँके अन्तर्गत क्षेत्र नं. १ को प्रतिनिधि सभातर्फ रामबहादुर यादव तथा प्रदेशसभा तर्फ १ (१) मा अम्मरबहादुर खड्का र १ (२) मा लालबहादुर शाह उम्मेदवार बनेका छन्। त्यसैगरी क्षेत्र नं. २ मा भौतिक पूर्वाधार विकास मन्त्री तथा जसपा लुम्बिनी प्रदेशका इन्चार्ज मोहम्मद इस्तियाक राई प्रतिनिधिसभाका उम्मेदवार बनेका छन् भने प्रदेशसभातर्फ २ (१) मा आदेश अग्रवाल र २(२) मा भण्डारीलाल यादवले उम्मेदवारी दिएका छन्। बाँकेकै क्षेत्र नं. ३ मा प्रतिनिधि सभाका लागि नोयेन्द्र धिताल उम्मेदवार बनेका छन् भने प्रदेशसभा तर्फ ३ ( १) मा गयासुद्दीन खान र ३ (२) मा विजय कुमार पाठकले उम्मेदवारी दिएका छन्। दाङको क्षेत्र नं. १ को प्रदेशसभातर्फ १(१) मा जगतराम यादव उम्मेदवार बनेका छन् भने क्षेत्र नं. ३ को प्रतिनिधि सभातर्फ देवीलाल डाँगी उम्मेदवार बनेका छन्।
जसपाले अर्घाखाँचीबाट प्रतिनिधिसभा सदस्यका लागि नेत्र थापालाई उम्मेदवार बनाएको छ भने प्रदेश सभातर्फ टुकबहादुर तेवालीलाई उम्मेदवार बनाएको छ। त्यस्तै गुल्मीको प्रदेश सभातर्फ घनश्याम पाण्डेलाई उम्मेदवार बनाएको छ। पार्टीका तर्फबाट पाल्पा क्षेत्र नं. १ मा मेहरमान राना प्रतिनिधि सभाका उम्मेदवार बनेका छन्। क्षेत्र नं. २ बाट प्रतिनिधिसभाका लागि द्रुपता सोमै उम्मेदवार बनेका छन् भने प्रदेशसभातर्फ २ (१) मा खिकबहादुर रेश्मी उम्मेदवार बनेका छन्।
नेकपा एमालेसँग चुनावी तालमेलमा रहेका तीन जिल्लाहरूतर्फ भने जसपाले नवलपरासीको क्षेत्र नं. २ को प्रदेशसभा २ (२) मा धरेन्द्र यादवलाई उम्मेदवार बनाएको छ। रुपन्देहीमा तीन सिट पाएका जसपाले क्षेत्र नं. ३ को प्रदेशसभातर्फ ३ (१) मा मेहन्द्र यादवलाई उम्मेदवार बनाएको छ। रुपन्देही क्षेत्र नं. ४ को प्रतिनिधि सभातर्फ ओमप्रकाश यादव गुल्जारी उम्मेदवार बनेका छन् भने ४ कै प्रदेशसभातर्फ ४ (२) का लागि राम अवतार यादव उम्मेदवार छन्।
त्यसैगरी कपिलवस्तुमा प्रदेश सभातर्फ तीन जनाको उम्मेदवारी परेको छ। क्षेत्र नं. १ को प्रदेशसभातर्फ १ (२) मा मेवालाल यादव, २ (२) मा अब्दुल रसिद खान र ३ (२) मा अशोककुमार यादवले उम्मेदवारी दिएका छन्।
