इन्टरनेशनल अलर्टको आर्थिक सहयोगमा समग्र जन उत्थान केन्द्र लहानमार्फत संचालित न्यायमा पहुँच सवलीकरण कार्यक्रम अन्तर्गत न्यायको लागि नागरिक संजालको त्रैमासिक बैठक लहानमा सम्पन्न भएको छ। बैठक संजालकी अध्यक्ष सुधा यादवको अध्यक्षतामा भएको थियो।
करीब दुई वर्षदेखि सिरहा जिल्लाको लहान नगरपालिका लगायतका विभिन्न पालिकामा द्वन्द्व पीडितहरूलाई न्याय दिलाउने उद्देश्यले संजाल गठन कार्य भइरहेका छन्। यस क्रममा शिक्षा, स्वास्थ्य, र अन्य स्थानीय तहका सरोकारवालाहरूसँग संवाद गर्दै कार्यक्रम सञ्चालन हुँदै आएको छ। लहान नगरपालिकामा सयौं द्वन्द्व पीडितहरू रहेका छन्, तर नगरपालिकाका प्रमुख महेश प्रसाद चौधरीले उनीहरूको न्यायका लागि कुनै चासो नदेखाएको आरोप लागेको छ। संजालका सदस्यहरू, जस्तै सुधा यादव, उमेश साह, र चन्द्र मोहन यादवले पटक–पटक बैठकको लागि नगरपालिकामा धाइरहे पनि महेश चौधरीले समय नदिएको बताएका छन्।
सोमबार बसेको बैठकमा आगामी कार्य योजनाको लागि विभिन्न बुँदामा छलफल भएको र आवश्यक निर्णय गरिएको संजालकी अध्यक्ष सुधा यादवले बताइन्। बैठकमा सुधा यादवसहित उमेश साह, चन्द्र मोहन यादव, जुरी ठाकुर, चन्द्रेश्वर साह, बिश्व अवार्ड पाएकी रिता महतो,नन्दीलाल सारकी र अधिवक्ता प्रभा नायक लगायतका व्यक्तिहरू उपस्थित थिए।
संकटकालमा राज्य वा विद्रोही पक्षबाट आक्रमणमा परेर अंगभंग, बेपत्ता, अपांग, र घाइते भएका द्वन्द्व पीडितहरूको अवस्था राज्यले व्यवस्थित नगर्दा लाखौं व्यक्तिहरू समस्यामा परेका छन्। जनयुद्धको नेतृत्व गर्ने पक्ष सरकारमा पटक–पटक भए पनि द्वन्द्व पीडितहरूका लागि कुनै सेवा–सुविधा उपलब्ध नगराइएको कारण उनीहरूको अवस्था दयनीय बन्दै गएको छ।
सरकारले आफ्नो जिम्मेवारी पुरा नगरेका कारण विभिन्न गैरसरकारी संघ–संस्थाहरूले द्वन्द्व पीडितहरूको लागि काम गरिरहेका छन्।
