अनिता चौधरी लहान – समग्र जन उत्थान केन्द्र लहान, सिरहाले केयर नेपालको साझेदारीमा संचालित बेजोज परियोजना अन्तर्गत बालिका समावेशी शिक्षा सञ्जाल गठन तथा गुनासो सुनुवाइ व्यवस्थापन सम्बन्धी तीन दिने तालिम लहानमा सम्पन्न भएको छ। समुन्नत नेपाल र समग्र जन उत्थान केन्द्रको आयोजना, केयर नेपालको सहयोग र शिक्षा तथा मानव स्रोत विकास केन्द्रको समन्वयमा संचालित तालिममा प्रशिक्षकका रूपमा मानव स्रोत विकास केन्द्रको समावेशी शिक्षा शाखा अधिकृत विमला मिश्र रहनु भएको थियो। तालिममा धनगढीमाई नगरपालिका, भगवानपुर गाउँपालिका, सखुवानन्कारकट्टी गाउँपालिका र नरहा गाउँपालिकाका शिक्षा शाखा, महिला बालबालिका तथा ज्येष्ठ नागरिक शाखा, विद्यालयका प्रधानाध्यापक, लैंगिक सम्पर्क शिक्षकलगायत २२ जनाको उपस्थिति रहेको थियो।
कार्यक्रममा विद्यालयमा गुनासो पेटिका स्थापनाको कार्यान्वयन प्रक्रिया बारे सहजीकरण गरिएको थियो। गुनासो सुनुवाइ कार्यविधि २०७४ लाई आधार मानेर विद्यालयले गुनासो सुनुवाइ समिति गठन गरी यस विषयमा विद्यालयमा अभिमुखीकरण गर्ने, कार्यान्वयन प्रक्रिया अगाडि बढाउने र अभिभावकसँग पनि यसबारेमा संवाद गर्ने प्रतिवद्धता तालिममा सहभागी विद्यालयका प्रधानाध्यापकहरूले जनाएका थिए।
