अनिता चौधरी लहान – समग्र जन उत्थान केन्द्र लहान सिरहाले केएर नेपालको साझेदारीमा संचालित उडान ५ परियोजना अन्तर्गत उद्यमशिलता विकासको लागि किशोरीहरुलाई सिलाई कटाई र ब्युटी पार्लर सम्बन्धि ३ महिने तालिम २०८१।०६।०२ गते बुधबारका दिन सम्पन्न भएको छ । भगवानपुर गाउँपालिका वडा नं. २ नरहाको लक्ष्मीनारायण विद्यालयमा संचालित तालिममा आधारभुत सिकाई पश्चात किशोरीहरुले आफ्नै व्यवसाय संचालन गर्न सक्ने उदेश्यले प्रशिक्षण दिइएको केएरका प्रतिनिधि कविता चौधरीले बताए । समग्र जन उत्थान केन्द्रको कार्यक्रम व्यवस्थापक गोपाल चौधरीको अध्यक्षतामा भएको कार्यक्रममा भगवानपुर गाउँपालिका वडा नं. २ का अध्यक्ष सुर्य नारायाण यादव प्रमुख अतिथि, केएरका प्रतिनिधि कविता चौधरी अतिथि रहनु भएको थियो । सिलाईकटाई तर्फ १३ जना किशोरीलाई कबिता साहले र ब्युटी पार्लर तर्फ ८ जना किशोरीलाई कविता कार्कीले प्रशिक्षण दिएका थिए।
कार्यक्रममा ३ महिनामा शिप सिक्दै गर्दाको अनुभव किशोरीहरुले आदानप्रदान गरे भने सिमान्तकृत समुदायका किशोरीहरुका लागि सिपमुलक तालिम संचालन गरेकोमा पालिकाको तर्फबाट वडा अध्यक्ष यादवले आयोजक र सहयोगी संस्थालाई धन्यवाद व्यक्त गर्दै अगामी दिनमा समेत यस्ता कार्यक्रमलाई निरन्तरता दिन अनुरोध गरे । समापन मन्तव्य दिदै समग्रका तर्फबाट चौधरीले सिमान्तकृत समुदायका किशोरीहरुका लागि उद्यमशिलता विकास तथा उत्थानशील जीविकोपार्जनको लागि वडा र पालिकाले वजेट विनियोजन गरी कार्यक्रम गर्न अनुरोध गर्दै कार्यक्रम समापन गरे ।
यस अघि समग्र जन उत्थान केन्द्रले सर्फ, दालमोठ भुजिया, लाहचुरा, तरकारी खेती सम्बन्धि तालिम २९ जना किशोरीहरुलाई दिइसकेका छन् ।
