बेइजिङ । युक्रेनविरुद्धको युद्धका लागि पश्चिमी प्रतिबन्धका कारण रुसी उड्डयन क्षेत्र प्रभावित भएको छ। यसका लागि रुसले चीनसँग सहयोग माग गरे पनि चीनले भने रुसलाई विमानका पार्टपुर्जाहरू उपलब्ध गराउन अस्वीकार गरेको छ।
हवाईजहाजको पार्टपुर्जाको आपूर्तिका लागि रुसले अब भारत, टर्की र अन्य देशबाट सहयोग लिने योजना बनाएको ग्लोबल डिफेन्स कर्पोरेशनले जनाएको छ ।
रुसी समाचार एजेन्सी इन्टरफ्याक्सका अनुसार चीनले प्रतिबन्धको बीचमा विमानका पार्टपुर्जाहरू आपूर्ति गर्न अस्वीकार गरेपछि रुसको हवाई यातायात एजेन्सी रोसाभियात्सियाले विमानका पार्टपुर्जाहरू आपूर्तिका लागि विभिन्न विकल्पहरू विचार गरिरहेको छ।
रोसाभिएट्सियाका अधिकारी भ्यालेरी कुडिनोभलाई इन्टरफ्याक्सले उद्धृत गर्दै भनेका छन्, ‘हामीले एयरलाइन्सहरूलाई आफ्नै पार्टपुर्जाको सम्भावित आपूर्तिकर्ता खोज्ने जिम्मेवारी दिएका छौं।
जहाँसम्म मलाई थाहा छ, चीनलाई अनुरोध गरिएको जानकारी छ, तर चीनले अस्वीकार गरेको छ।’ ‘हामी अन्य देशहरूमा (अवसरहरू) खोज्नेछौं। सायद, हाम्रा साझेदारहरू टर्की, वा भारत मार्फत सहयोग प्राप्त हुनेछ।
प्रत्येक कम्पनी आफैंमा सम्झौतामा पुग्नेछ जबकि हामी (रोसाभिएट्सिया) यी भागहरूलाई वैधानिक बनाउन मद्दत गर्नेछौं।’ रुसी एयरलाइन्सले प्रयोग गर्ने अधिकांश विमान बोइङ र एयरबसले बनाएका छन्।
यस महिनाको सुरुमा, बोइङ र एयरबसले युक्रेनमाथि आक्रमण गरेपछि रुसलाई विमानको स्पेयर पार्ट्स आपूर्ति बन्द गर्ने घोषणा गरेका थिए।
यी दुई बाहेक हवाई क्षेत्रका अन्य धेरै कम्पनीहरूले देशसँगको सम्बन्ध तोडेको ग्लोबल डिफेन्स कर्पोरेशनले जनाएको छ। भर्खरै, रुसको विदेश मन्त्रालयले रुसी यात्रुवाहकहरूको सुरक्षामा चिन्ता व्यक्त गरेको छ। यस हप्ताको सुरुमा, रूसी झण्डा वाहक एरोफ्लोटले छिमेकी बेलारुस बाहेक सबै अन्तर्राष्ट्रिय उडान सेवाहरू अस्थायी रूपमा निलम्बन गर्यो।
