नेपालगन्ज। नेपालगन्जस्थित प्रसिद्ध बागेश्वरी मन्दिरमा हरेक वर्षको बडा दसैँको अवसरमा भक्तजनले जिब्रो छेड्ने परम्परा निरन्तरता पाइरहेको छ। धार्मिक आस्था र यक्ष-मोक्ष प्राप्तिको विश्वाससहित भक्तजनले यो कठोर अनुष्ठान गर्छन्।
मन्दिरका मूल पुरोहित महन्त चन्द्रनाथ योगीका अनुसार, यो परम्परा प्राचीनकालदेखि चलिआएको हो। विशेषगरी बडादसैँको घटस्थापनादेखि निराहार व्रत बस्ने भक्तजनले आफ्नो मनोकामना पूरा भएपछि देवी बागेश्वरीलाई धन्यवादस्वरूप जिब्रो छेड्ने चलन रहेको छ।
पहिले जिब्रो काटेर देवीलाई चढाउने चलन भए पनि अहिले भक्तजनले जिब्रो छेडेर दर्शन गर्ने प्रचलनलाई निरन्तरता दिँदै आएका छन्। महन्त योगीले बताएअनुसार, यो मन्दिरमा पशुबली चढाउने र आफ्नै रगत चढाउने भक्तजनको परम्परा पनि रहेको छ। नवरात्रभर व्रत बसेका भक्तजनले नवमीको दिन त्रिशुलजस्तो तिखो धातु प्रयोग गरी आफ्नो जिब्रो छेड्ने गर्छन्।
हरेक वर्ष बडा दसैँ र चैतेदसैँको अवसरमा एक सयभन्दा बढी भक्तजनले बागेश्वरी माताको कृपा प्राप्तिका लागि जिब्रो छेड्ने गरेका छन्। यस परम्पराले घरमा दुःख, रोगव्याधि टर्दै, सम्पत्ति सुरक्षित हुने र यश-मोक्ष प्राप्त हुने धार्मिक विश्वास रहेको छ।
बागेश्वरी मन्दिरमा भक्तजनको यो आस्था र परम्परा नेपालगन्ज क्षेत्रकै एक महत्वपूर्ण धार्मिक तथा सांस्कृतिक सम्पदा हो।
