बैतडी।बैतडीमा युवती बेपत्ता भएको घटनामा महाकाली प्रहरी चौकी डिम्बरका इञ्चार्ज प्रहरी हवल्दार पक्राउ परेका छन्। पञ्चेश्वर गाउँपालिका–२ डिम्बरकी १९ वर्षीया युवती शुक्रबार बिहान पानी ल्याउने भन्दै घरबाट निस्किएकोमा बेपत्ता भएपछि स्थानीयले हवल्दार कृष्णराज जोशीमाथि संलग्नताको आरोप लगाएका हुन्।
घटनाले उग्र रूप लिएपछि स्थानीय बासिन्दाले जोशीलाई नियन्त्रणमा लिएर कुटपिट समेत गरेका छन्। जिल्ला प्रहरी कार्यालय बैतडीका डीएसपी मकेन्द्र मिश्रले जोशीलाई दाम्लोले बाँधेर कुटपिट गरिएको बताए। हाल जोशीको अवस्था खतरामुक्त रहेको र जिल्ला अस्पतालमा उपचार भइरहेको जानकारी दिइएको छ।
डीएसपी मिश्रका अनुसार, प्रारम्भिक अनुसन्धानमा जोशी र बेपत्ता किशोरीबीच विगतदेखि नै फोन सम्पर्क र भेटघाट हुने गरेको खुलासा भएको छ। घटनामा जोशीको संलग्नता हुनसक्ने आशंकामा उनलाई पक्राउ गरिएको हो। यद्यपि, जोशीको स्वास्थ्य अवस्थामा सुधार आएपछि मात्रै विस्तृत सोधपुछ र अनुसन्धान अघि बढाइने बताइएको छ।
युवतीको खोजीकार्य जारी रहे पनि हालसम्म फेला नपरेकीले स्थानीयमा थप आक्रोश फैलिएको छ। यो घटनाले महाकाली प्रहरी चौकीमा कार्यरत अन्य प्रहरीहरुलाई समेत प्रभावित बनाएको छ। चौकीका सहायक हवल्दार र दुई जना जवानलाई जिल्ला तानिएको र उनीहरूको ठाउँमा नयाँ प्रहरी टोली खटाइएको डीएसपी मिश्रले जानकारी दिएका छन्।
