काठमाडौँ। प्रधानमन्त्री केपी शर्मा ओलीले हालैका बाढी, पहिरो र डुबानका कारण भएको क्षतिलाई गम्भीरतापूर्वक लिँदै सुरक्षित एकीकृत बस्तीको योजना तत्काल कार्यान्वयन गर्ने बताएका छन्। खोटाङ जिल्लामा प्राकृतिक विपत्तिले पारेको क्षति र पुनर्निर्माणका कामबारे सर्वदलीय प्रतिनिधिमण्डलले बुझाएको ज्ञापनपत्रलाई ग्रहण गर्दै प्रधानमन्त्रीले पुनर्निर्माण तथा पुनः व्यवस्थापनको कामलाई प्राथमिकतामा राख्ने प्रतिवद्धता जनाएका छन्।
आज बालुवाटारमा आयोजित कार्यक्रममा प्रधानमन्त्री ओलीले बिहीबार बस्ने मन्त्रिपरिषद् र राष्ट्रिय विपद् जोखिम न्युनीकरण तथा व्यवस्थापन परिषद्को बैठकले प्रारम्भिक राहत, अस्थायी आवास तथा पुल पुनर्निर्माणका विषयमा निर्णय लिने बताए। उनले काठमाडौं जोड्ने सडकहरूलाई अस्थायी रूपमा सञ्चालनमा ल्याइएको जानकारी पनि दिए।
उपप्रधानमन्त्री एवं अर्थमन्त्री विष्णुप्रसाद पौडेलको उपस्थितिमा ओलीले सीमित बजेटका बाबजुद पुनर्निर्माणको कामलाई आफ्नै स्रोतसाधनबाट अघि बढाउनुपर्नेमा जोड दिए। फलाम खानीहरूको सञ्चालनपछि पुल निर्माणमा स्वदेशी कच्चा पदार्थको प्रयोग हुने कुरा पनि उनले उल्लेख गरे।
खोटाङको फोक्सिङटार पुल बाढीले बगाएपछि जिल्ला प्राकृतिक नाकाबन्दीमा परेको कुरा प्रतिनिधिसभा सदस्यहरू रामकुमार राई, सरस्वती बजिमय र अन्य स्थानीय नेताहरूले प्रधानमन्त्रीलाई जानकारी गराए।
