काठमाडौँ। सहकारी ठगी प्रकरणमा कास्की जिल्ला अदालतले राष्ट्रिय स्वतन्त्र पार्टी (रास्वपा)का सभापति रवि लामिछानेविरुद्ध पक्राउ पुर्जी जारी गरेपछि लामिछानेले सामाजिक सञ्जालमा आक्रोश व्यक्त गरेका छन्। उनले सरकार र राजनीतिक नेताहरूले आफूमाथि अन्यायपूर्ण व्यवहार गरेको दाबी गरेका छन्।
शुक्रबार साँझ लामिछानेले फेसबुकमा लेखेको स्टाटसमा उनले सरकारप्रति असन्तुष्टि प्रकट गर्दै, आफूलाई गलत आरोपमा फसाउन खोजिएको आरोप लगाए। लामिछानेले भ्रष्टाचारमा संलग्न नेताहरूलाई संरक्षण गरिएको र आफूलाई बलिको बोको बनाउन खोजिएको दाबी गरेका छन्।
उनले लेखेका छन्, “तपाईंहरू तस्कर र भ्रष्टाचारीलाई जोगाउँदै हुनुहुन्छ, तर मलाई ठगीको आरोप लगाइयो। म कुनै दोषी छैन, कानूनी प्रक्रिया अनुसार सहयोग गर्छु।”
लामिछानेले सरकारलाई चुनौती दिँदै, सहकारी पीडितहरूको मुद्दामा आफूले नेतृत्व लिने घोषणा गरे। साथै, उनले न्यायालयप्रति आफ्नो भरोसा रहेको र आम जनता तथा रास्वपा समर्थकलाई शिर ठाडो राख्न आह्वान गरेका छन्।
सहकारी ठगी प्रकरणमा उनको संलग्नताबारे अनुसन्धान जारी रहेको भए पनि लामिछानेले आफू निर्दोष रहेको अडान लिएका छन्।
