—- लहान नगरपालिका वडा नम्बर १५ का किसानहरूले केयर नेपालको आर्थिक सहयोगमा वितरण गरिएका सामग्री प्राप्त गरेका छन्। कार्यक्रमको आयोजना राष्ट्रिय कृषक समूह महासंघ नेपालले गरेको थियो भने सामुदायिक वन उपभोक्ता महासंघको सहकार्य र लहान नगरपालिकाको समन्वयमा सम्पन्न भएको हो। यस वितरण कार्यक्रमको मुख्य उद्देश्य किसानहरूलाई विषादीमुक्त र स्वस्थ तरकारी उत्पादनमा संलग्न गराउनु हो।
कार्यक्रम अन्तर्गत नमुना कृषक समूह, डिदवार बाबा कृषक समूह, र राजदेवी कृषक समूहमा आवद्ध ६३ जना किसानहरूलाई विषादीमुक्त तरकारी खेती गर्न प्रोत्साहित गर्दै विभिन्न प्रकारका सामग्रीहरू निःशुल्क वितरण गरिएको छ। प्रदान गरिएका सामग्रीमा ११ प्रकारका जैविक तरकारी बिउहरू, सिचाइका लागि समर्सिबल मोटर, इलेक्ट्रिक स्प्रे मेसिन, र अन्य कृषि उपकरणहरू समावेश थिए। करिब २ लाख रुपैयाँ बराबरका यी सामग्रीहरू किसानहरूको लागि वितरण गरिएको हो। कार्यक्रमको नेतृत्व राष्ट्रिय कृषक समूह महासंघका प्रदेश संयोजक दिलीप कुमार साहले गर्नुभएको थियो।
साहका अनुसार, यस कार्यक्रमको मुख्य उद्देश्य किसानहरूलाई जैविक खेतीतर्फ आकर्षित गर्दै उनीहरूको उत्पादन क्षमता वृद्धि गर्नु र स्वस्थ वातावरणीय कृषि प्रणालीलाई प्रवर्द्धन गर्नु हो। जैविक खेतीबाट उत्पादन भएका विषादीमुक्त तरकारीहरू बजारमा राम्रो मूल्यमा बिक्री हुने भएकाले यसले किसानहरूको आय वृद्धि गर्ने लक्ष्य लिएको छ।
कार्यक्रमका प्रमुख अतिथि लहान नगरपालिकाका नगर प्रमुख महेश प्रसाद चौधरीले किसानहरूको योगदान र महत्वलाई विशेष रूपमा जोड दिनुभएको थियो। उहाँले किसानहरूको समृद्धि नै नगरको समृद्धि भएको बताउँदै आगामी दिनमा नगरपालिकाले थप कृषि सामग्री वितरण गर्ने योजना रहेको जानकारी दिनुभयो। साथै, अति विपन्न किसानहरूको लागि विशेष योजनासहित करार खेतीको व्यवस्था गर्ने प्रतिवद्धता पनि जनाउनुभयो। चौधरीले नगरको कृषि क्षेत्रलाई आधुनिक प्रविधिसँग जोड्दै आत्मनिर्भर बनाउन विभिन्न योजनाहरूको सुरुवात गरिने उल्लेख गर्नुभयो।
उप प्रमुख राम चलितर महतोले किसानको महत्त्वपूर्ण भूमिका र उनीहरूको योगदान बिना लहान नगरपालिकाको दिगो विकास असम्भव रहेको बताउनुभयो। उहाँले उत्पादन भएको उपजको उचित बजारीकरण गर्नुपर्नेमा जोड दिँदै किसानहरूको आयस्तर सुधार गर्न निरन्तर प्रयास गर्नुपर्ने कुरा पनि उल्लेख गर्नुभयो। महतोले राष्ट्रिय कृषक समूह महासंघको सक्रियतालाई प्रशंसा गर्दै यसले सिरहा, सप्तरी, धनुषा, र उदयपुर लगायतका जिल्लाका किसानहरूको समस्या समाधानमा महत्त्वपूर्ण भूमिका खेलेको बताउनुभयो।
कार्यक्रममा केयर नेपालका कार्यक्रम व्यवस्थापक जगदीश भट्टले यस्तो किसिमको कार्यक्रमले किसानहरूको उत्पादनमा सकारात्मक प्रभाव पार्ने र उनीहरूलाई जैविक खेतीतर्फ आकर्षित गर्ने विश्वास व्यक्त गर्नुभयो। सामुदायिक वन उपभोक्ता महासंघका प्रतिनिधि टेकेंद्र साहले पनि किसानहरूको उत्थान र कृषि क्षेत्रमा सुधार ल्याउन सधैं सहयोग गर्ने प्रतिबद्धता जनाउनुभयो।
कार्यक्रममा कृषि शाखाका प्रतिनिधि बद्री नारायण चौधरी, वडा अध्यक्ष तेज नारायण चौधरी लगायतका विशिष्ट व्यक्तिहरूको उपस्थिति रहेको थियो भने स्थानीय किसानहरूको उल्लेखनीय सहभागिता पनि देखिएको थियो। किसान प्रतिभा तामाङले निःशुल्क सामग्री पाएपछि खुशी व्यक्त गर्दै केयर नेपाल र राष्ट्रिय कृषक समूह महासंघलाई धन्यवाद दिनुभयो। उहाँले यस प्रकारको सहयोगले किसानहरूको मनोबल बढ्ने र जैविक तरकारी उत्पादनमा थप उत्साह पैदा हुने विश्वास व्यक्त गर्नुभयो।
कार्यक्रममा सहभागी अन्य किसानहरूले पनि सामग्री प्राप्त गर्दा खुशी व्यक्त गर्दै सरकार र अन्य सरोकारवाला निकायहरूलाई यस्ता सहयोगात्मक कार्यक्रमलाई निरन्तरता दिन आग्रह गरेका छन्। यस किसिमको सहयोगले किसानहरूको जीवनस्तर उकास्न र लहान क्षेत्रको कृषि क्षेत्रमा दीर्घकालीन सुधार ल्याउन महत्त्वपूर्ण योगदान पुर्याउने अपेक्षा गरिएको छ।
