मधेसलाई पटक-पटक धोका दिने काम उपेन्द्र यादवबाट भएको छ: मन्त्री प्रदीप यादव

नेत्र दैनिक
१० कार्तिक २०८१, शनिबार १८:०१

वीरगञ्ज – संघीय खानेपानी मन्त्री प्रदीप यादवले जसपा नेपालका अध्यक्ष उपेन्द्र यादवमाथि सत्ताका लागि मधेसका जनतालाई पटक-पटक धोका दिएको आरोप लगाएका छन्। पर्सामा आयोजित पार्टी प्रवेश कार्यक्रममा बोल्दै मन्त्री यादवले जसपाका नेता उपेन्द्र यादवको सत्ता लोलुपताको प्रवृत्तिले जनआकांक्षासँग मेल नखाने र मधेसको भावना मर्माहत गरेको बताए।

उनले भने, “हामी केवल राजनीति गर्न आएका छैनौं, जनताको जीवनस्तर सुधार्न र स्थायी परिवर्तन ल्याउन आएको हौं।” मन्त्री यादवले आफ्नो नेतृत्वको जसपा नेपाल अबको विकल्प भएको पनि दाबी गरे।

पार्टी प्रवेश कार्यक्रममा नवप्रवेशीहरूलाई स्वागत गर्दै जसपाका उपमहासचिव समेत रहेका यादवले पार्टीको आधार अझ सुदृढ भइरहेको बताए। उनले जसपा नेपालबाट निराश भएका नेता तथा कार्यकर्ताहरू नयाँ आशासहित आफ्नो पार्टीतर्फ आकर्षित भइरहेको समेत उल्लेख गरे।