काठमाडौं।गृहमन्त्री रमेश लेखकले लोकतन्त्रलाई अनुशासन र अवसरको समान वितरणका आधारमा सुदृढ बनाउनुपर्ने आवश्यकता औंल्याएका छन्। आइतबार काठमाडौंमा आयोजित गैर आवासीय नेपाली संघ (एनआरएनए) को कार्यक्रममा बोल्दै मन्त्री लेखकले वर्तमान सरकार नागरिकलाई अवसर र सम्भावना प्रदान गर्न सक्रिय रहेको र जनताको निराशा चिर्न कटिबद्ध रहेको बताए।
गृहमन्त्री लेखकले लोकतन्त्रलाई दीर्घकालसम्म टिकाउन अनुशासन (डिसिप्लेन) र वितरण (डिस्ट्रिब्युशन) को सिद्धान्त आवश्यक रहेको बताए। उनले लोकतन्त्रलाई अराजकता नभई अनुशासनको प्रणालीको रुपमा बुझ्नुपर्ने र यसलाई सुदृढ गर्न सबै नागरिकलाई समुचित अवसरको पहुँच दिलाउन आवश्यक रहेको बताए।
उनले संविधानले दिने राजनीतिक, आर्थिक, सामाजिक अधिकारका साथै शिक्षा र स्वास्थ्यजस्ता सुविधाहरूलाई सबै जनतासम्म पु¥याउन वर्तमान सरकार प्रयासरत रहेको जानकारी गराए। “हामी यहाँ कुनै व्यक्तिलाई सत्तामा राख्न वा मन्त्री बनाउन आएका होइनौं,” उनले भने, “यो सरकार विशिष्ट उद्देश्यका साथ बनेको हो—जनताको निराशा र चिन्तालाई चिर्न तथा आशामा बदल्नका लागि।”
साथै, गृहमन्त्रीले विदेशमा रहेका नेपालीहरूलाई देशभित्रको आर्थिक विकासमा योगदान पुर्याउन आह्वान गर्दै एनआरएनएहरूसँगको सहकार्यलाई सरकारले प्राथमिकतामा राखेको स्पष्ट पारे।
गृहमन्त्री लेखकका भनाइले वर्तमान सरकारको प्राथमिकता जनताको आशा र अवसरको समान वितरणमा रहेको र देशलाई समृद्धि र विकासतर्फ उन्मुख गराउने स्पष्ट सन्देश दिएको छ।
