लहान । खुट्टी खोला सिंचाई नहरलाई ढलको रूपमा प्रयोग गर्ने लहान नगरपालिकाको निर्णयको विरोधमा किसानहरूले आज लहानमा विशाल र्याली निकालेका छन्। खुट्टी खोला नहर सिंचाई संघर्ष समितिको नेतृत्वमा आयोजित उक्त र्यालीमा “नहरलाई ढल बनाउन पाइदैन”, “किसान विरोधी मेयर चाहिदैन”, र “किसानको माग पूरा गर” जस्ता नारासहित प्रदर्शन गरिएको थियो।
र्यालीको सुरुवात लहानस्थित पशुपति आदर्श माध्यमिक विद्यालयबाट भएको थियो, जहाँ सयौं किसानहरूको उत्साहपूर्ण सहभागिता देखियो। र्याली नगरका विभिन्न भागको परिक्रमा गर्दै शहीद चौकमा कोण सभामा परिणत भयो। सहभागी किसानहरूले नहरलाई सिंचाईका लागि मात्र प्रयोग गर्नुपर्ने र कृषि क्षेत्रमा यसको महत्वलाई ध्यान दिनुपर्ने माग राखे।
संघर्ष समितिका अध्यक्ष धर्मराज चौधरीले नहरलाई ढलमा परिणत गर्ने निर्णय किसान विरोधी रहेको भन्दै यस योजनालाई तत्काल फिर्ता लिनुपर्ने चेतावनी दिए। उनीहरूले “जय जवान, जय किसान” को नारा लगाउँदै सिंचाई सुविधालाई सुरक्षित राख्न नगरपालिकालाई दबाब दिएका छन्।
