सप्तरी, १२ कार्तिक।सप्तरीको सुरुङ्गा नगरपालिका वडा नं. ४ कदमाहामा रहेको महिला जनशक्ति विकास केन्द्रले सुरुङ्गा नगरपालिका वडा नं. ९ मा अवस्थित जनता आधारभूत विद्यालय परमाणपुरका ३ सय विद्यार्थीहरूलाई शैक्षिक सामग्री वितरण गरेको छ। केन्द्रले विद्यार्थीहरूको पठनपाठनलाई प्रोत्साहन गर्ने उद्देश्यले कपि र कलम वितरण गरेको हो।
महिला जनशक्ति विकास केन्द्रले विद्यालयलाई सरसफाइ सामग्री समेत प्रदान गरेको छ। सरसफाइलाई ध्यानमा राख्दै विद्यालयलाई कुचो, हर्पिक, ब्रस, फिनेल, मग, डस्टबिन, बाल्टिन, साबुन जस्ता सामग्रीहरू हस्तान्तरण गरिएको अध्यक्ष पुनम यादवले जानकारी दिएकी छन्।
सामग्री हस्तान्तरणसँगै महिला जनशक्ति विकास केन्द्रका सदस्यहरूले विद्यालय हाताको वरिपरि सरसफाइ समेत गरेका थिए। कार्यक्रमको अवसरमा केन्द्रले बितेको विजयादशमी, आउँदै गरेको दीपावली तथा छठ पर्वको अवसरमा शुभकामना आदानप्रदान कार्यक्रम पनि आयोजना गरेको थियो।
विद्यालय व्यवस्थापन समितिका अध्यक्ष हरिदेव चौधरीको अध्यक्षतामा सम्पन्न कार्यक्रममा जनमत पार्टीका कार्यकारिणी समिती सदस्य ममता झा प्रमुख अतिथि थिइन्। कार्यक्रममा विशिष्ट अतिथिको रूपमा थारु जनमत महिला संघकी प्रदेश अध्यक्ष मंजु चौधरी तथा जिल्ला अध्यक्ष रेखा मण्डल उपस्थित थिए। अन्य अतिथिहरूमा केन्द्रकी उपाध्यक्ष चन्द्रीका राम, सचिव रुवि राम, कोषाध्यक्ष संजु महरा, वडा अध्यक्ष सन्त कुमार यादव, पूर्व प्रधानाध्यापक श्याम सुन्दर यादव, वर्तमान प्रधानाध्यापक जीवन कुमार चौधरी, शिक्षक लक्ष्मी चौधरी र प्रमिला चौधरीको उपस्थिति रहेको थियो।
कार्यक्रममा स्वागत मन्तव्य शिक्षक इन्द्रनारायण चौधरीले व्यक्त गरेका थिए भने सञ्चालन शिक्षक विश्वनाथ यादवले गरेका थिए।
