काठमाडौं। प्रधानमन्त्री केपी शर्मा ओलीले नेपाल दूरसञ्चार कम्पनी लिमिटेड (नेपाल टेलिकम) लाई जनतासमक्ष गुणस्तरीय सेवा दिनका लागि विशेष निर्देशन दिएका छन्। प्रधानमन्त्री कार्यालयमा आयोजित एक बैठकमा दैवी प्रकोप उद्धार कोषमा टेलिकमद्वारा दाखिला गरिएको एक करोड दुई लाख ७० हजारको सहयोग रकमबारे जानकारी दिन पुगेको टेलिकमको टोलीलाई प्रधानमन्त्रीले सम्बोधन गर्दै यस्तो निर्देशन दिएका हुन्।
प्रधानमन्त्री ओलीले टेलिकमलाई राष्ट्रको सम्पत्ति भएकोले सेवाको गुणस्तरमा कुनै कमी हुन नदिन र जनताको विश्वास कायम राख्न विशेष ध्यान दिन आग्रह गरे। उनले सेवा प्रवाहका लागि आवश्यक उपकरण र प्रविधिमा सहयोग प्रदान गर्न सरकार प्रतिबद्ध रहेको पनि स्पष्ट पारे।
उक्त बैठकमा सञ्चार तथा सूचना प्रविधिमन्त्री पृथ्वीसुब्बा गुरुङ र सचिव राधिका अर्याल समेत सहभागी थिए। बैठकको दौरान टेलिकमका प्रबन्ध निर्देशक सङ्गीता अर्यालले टेलिकमले सामाजिक उत्तरदायित्व अन्तर्गत विभिन्न क्षेत्रमा योगदान गर्दै आएको जानकारी गराइन्।
