काठमाडौं। काठमाडौं महानगरपालिका प्रमुख बालेन्द्र साहले सिंहदरबार वैद्यखाना विकास समितिको दुर्दशाप्रति गम्भीर चिन्ता प्रकट गरेका छन्। उनले आज सिंहदरबार वैद्यखाना विकास समितिको ३०औँ वार्षिकोत्सवको अवसरमा आयोजित कार्यक्रममा उक्त वैद्यखानाको खस्किँदो अवस्थाले समग्र मुलुकको आर्थिक र सामाजिक स्थितिको प्रतिबिम्ब प्रस्तुत गरेको बताए।
नगरप्रमुख साहले आयुर्वेदिक उपचार प्रणालीलाई नेपाली संस्कृति र परम्परासँग जोडिएको बताउँदै वैद्यखानालाई धराशायी पर्न नदिन सामूहिक पहल आवश्यक रहेको उल्लेख गरे। उनले वैद्यखानाको आर्थिक स्थिति र स्रोत व्यवस्थापनमा सुधार गर्दै आयुर्वेदिक उपचार र औषधि उत्पादनको प्रवर्द्धनमा लाग्न आग्रह गरेका छन्।
उनका अनुसार, पहिले सिंहदरबार परिसरमा औषधि उत्पादन अत्यधिक हुने गरेकामा हाल भवन निर्माणले जमिन खुम्चिँदै गएको छ भने उत्पादन पनि घटेको छ। साथै, नगरप्रमुखले यस क्षेत्रको बजेटसमेत ह्रास हुँदै गएको, हाल जम्मा एक करोड रहेको तथ्यांक प्रस्तुत गरे।
