काठमाडौं – प्रधानमन्त्री केपी शर्मा ओलीले वर्तमान सरकारले मुलुकमा आर्थिक समृद्धि ल्याउन दृढ संकल्पित रहेको बताउनुभएको छ। नेपाल प्रज्ञा–प्रतिष्ठानमा आयोजित ‘सिस्नोपानी देउसी कार्यक्रम–२०८१’लाई सम्बोधन गर्दै उहाँले सरकार देशको विकास र आर्थिक उन्नतिको मार्गमा अघि बढिरहेको प्रस्ट पार्नुभयो।
प्रधानमन्त्री ओलीले देशमा भएको विकास र सुधारको क्रमलाई सकारात्मक दृष्टिले हेर्न आग्रह गर्दै “देश बनाउने काम एकछिनमा सम्पन्न हुने कुरा होइन। तर, विरोधीहरू विकासलाई नदेखेझैं गरिरहेका छन्,” भनी टिप्पणी गर्नुभयो। उहाँले राष्ट्र निर्माणमा सबै नेपालीलाई एकजुट हुनुपर्नेमा जोड दिँदै सभ्य र मर्यादित भाषामा मात्रै आलोचना गर्नुपर्ने धारणा राख्नुभयो।
कार्यक्रममा प्रधानमन्त्री ओलीले राष्ट्रियता र स्वाभिमानलाई उच्च स्थानमा राख्दै सरकार जनअपेक्षाअनुरूप तीव्र गतिमा अघि बढ्ने वचन दिनुभयो। यस अवसरमा उहाँले तिहार पर्वको अवसरमा सबै नेपालीलाई शुभकामना व्यक्त गर्नुभएको थियो।
उक्त देउसी कार्यक्रममा प्रतिनिधिसभाका सभामुख देवराज घिमिरे, राष्ट्रियसभाका अध्यक्ष नारायणप्रसाद दाहाल, माओवादी केन्द्रका अध्यक्ष पुष्पकमल दाहाल ‘प्रचण्ड’ लगायतका प्रमुख नेताहरूको पनि उपस्थिति थियो।
