काठमाडौँ: लोकप्रिय भिडियो शेयरिङ सामाजिक सञ्जाल प्लेटफर्म टिकटक नेपालमा आधिकारिक रूपमा दर्ता भएको छ। सञ्चार तथा सूचना प्रविधि मन्त्रालयका सहसचिव एवं प्रवक्ता गजेन्द्रकुमार ठाकुरका अनुसार टिकटकले सबै आवश्यक कागजात पेस गरेपछि विधिवत रूपमा दर्ता प्रक्रिया पूरा भएको हो।
नेपालमा सामाजिक सञ्जाललाई व्यवस्थित गर्न बनाइएको निर्देशिका अनुसार टिकटकले दर्ता प्रक्रिया अघि बढाएको हो। यसअघि, २०८० कात्तिक २७ मा टिकटकमा अश्लील सामग्री र आपत्तिजनक सामग्री फैलाएको आरोपमा सरकारले प्रतिबन्ध लगाउने निर्णय गरेको थियो। तर, भदौ ६ मा सो प्रतिबन्ध फुकुवा गरियो, र टिकटकलाई आधिकारिक रूपमा दर्ता गरेर कानूनी रूपमा सञ्चालनको अनुमति प्रदान गरियो।
टिकटक नेपालमा आधिकारिक रूपमा दर्ता भएपछि सरकारलाई राजस्व संकलनको पनि मार्ग खुलेको छ। अब सरकारलाई टिकटकमा कुनै आपत्तिजनक सामग्री देखिएमा तुरुन्त पत्राचार गरेर हटाउन निर्देशन दिन सक्ने अधिकार हुनेछ।
यससँगै, नेपालमा टिकटकको भूमिका केवल मनोरञ्जनको सीमामा मात्र नरही, सामाजिक र आर्थिक रूपमा पनि योगदान दिने पक्षमा महत्वपूर्ण कदम अघि बढेको छ।
