कपिलवस्तु: कपिलवस्तु जिल्लाको दक्षिण-पश्चिम क्षेत्र अन्तर्गत इलाका प्रहरी कार्यालय कृष्णनगरले लागु औषध विरुद्ध आक्रमक अभियान चलाउँदै, ठूलो मात्रामा लागु औषध नियन्त्रणमा लिएको छ। प्रहरी निरीक्षक सुरज खत्रीको नेतृत्वमा प्रहरी टोलीले १३ हजार ट्रामाडोल क्याप्सुलसहित एक युवकलाई पक्राउ गरेको छ।
मंगलबार राति करिब ९:३० बजे कृष्णनगर नगरपालिका वडा नं. ३ हनुमानढीबाट संकास्पद रूपमा पैदल हिँडिरहेका कपिलवस्तु नगरपालिका वडा नं. २, झण्डेनगर निवासी १९ वर्षीय सिकन्दर चौहानलाई प्रहरीले नियन्त्रणमा लिएको हो। चौहानले बोकेको प्लास्टिकको बोराको तलासी गर्दा भित्र लुकाएर राखिएको ट्रामाडोल हाइड्रोक्लोराइड आई. पी. ५०mg लेखिएको ६५० पत्तामा रहेका १३ हजार क्याप्सुल फेला परेको प्रहरी निरीक्षक खत्रीले जानकारी दिएका छन्। साथै, चौहानसँग नारजो कम्पनीको मोबाइल सेट पनि बरामद गरिएको छ।
प्रहरी निरीक्षक सुरज खत्री कृष्णनगर इलाका प्रहरी कार्यालयको प्रमुखका रूपमा नियुक्त भएपछि लागु औषध कारोबार र प्रयोग नियन्त्रणमा आक्रामक अभियान चलाउँदै आएका छन्। उनले आफ्नो कार्यकालमा दर्जनौं लागु औषध कारोबारी र प्रयोगकर्तालाई पक्राउ गरी मुद्दा चलाइसकेका छन्। खत्रीको सक्रियताले स्थानीय समाजमा लागु औषध नियन्त्रणमा उल्लेखनीय सुधार आएको बताइन्छ।
कपिलवस्तु जिल्ला अदालतबाट पक्राउ परेका चौहानको हकमा सात दिनको म्याद थप गरी थप अनुसन्धान भइरहेको इलाका प्रहरी कार्यालय कृष्णनगरले जनाएको छ। यस घटनाले प्रहरी निरीक्षक खत्रीको अभियानलाई अझ सशक्त बनाएको छ भने स्थानीय बासिन्दाले लागु औषध मुक्त समाज निर्माणमा प्रहरीको सक्रियता र प्रयासलाई सराहना गरेका छन्।
प्रहरी निरीक्षक खत्रीको नेतृत्वमा लागु औषध कारोबारमाथि कडाइ गर्दै स्थानीय समुदायलाई सुरक्षित र स्वस्थ बनाउने उद्देश्यले सञ्चालन भइरहेको यो अभियानले थप सफलताको बाटो लिने अपेक्षा गरिएको छ।
