काठमाडौँ, २९ कात्तिक — उपप्रधानमन्त्री तथा सहरी विकासमन्त्री प्रकाशमान सिंहले नेपालमा उत्पादनमूलक क्षेत्रलाई सशक्त बनाउन र अर्थतन्त्रलाई चलायमान बनाउन सरकार गम्भीर रहेको बताएका छन्। ‘फिन इलेक्ट्रो टेक–२०२४’ प्रदर्शनीको उद्घाटन गर्दै सिंहले उद्योगी व्यवसायीलाई उत्पादनमूलक क्षेत्रमा लगानी बढाउन आग्रह गरेका हुन्। साथै, उनले प्रसारण लाइन र अन्य ऊर्जा क्षेत्रहरूमा नेपालमै बनेका सामग्रीको प्रयोगलाई प्राथमिकता दिनुपर्ने बताए।
सिंहले कूल गार्हस्थ्य उत्पादन वृद्धिमा योगदान पुर्याउन स्वदेशी उत्पादन बढाउनु आवश्यक रहेको र ‘क्लिन इनर्जी’ निर्यातमा जोड दिनुपर्नेमा पनि बल दिए।
यस अवसरमा नेपाल उद्योग वाणिज्य महासङ्घका अध्यक्ष चन्द्रप्रसाद ढकालले आयात नियन्त्रणको असर र निजी क्षेत्रका चासोप्रति सरकारले गम्भीर हुनुपर्ने सुझाव दिए। आगामी मङ्सिर २ गतेसम्म चल्ने यो प्रदर्शनीमा ४४ ब्लक, २८ स्टल, र एक प्याभिलिएनमा विद्युतीय उपकरण तथा वैकल्पिक ऊर्जा सामग्री प्रदर्शनीमा राखिएका छन्।
‘फिन इलेक्ट्रो टेक’ प्रदर्शनी नेपालमा प्रत्येक दुई वर्षमा आयोजना हुँदै आएको छ, र यस पटक यसको ११औं संस्करण हो।
