काठमाडौं, कार्तिक ३० – काठमाडौं महानगरपालिकाका मेयर बालेन्द्र शाह (बालेन) ले देशका नेताहरूलाई लक्षित गर्दै कडा अभिव्यक्ति दिएका छन्। बुधबार सामाजिक सञ्जाल फेसबुकमा आफ्नो धारणा सार्वजनिक गर्दै उनले नेताहरूले देश नै बेच्न खोजेको आरोप लगाए।
उनले लेखे, “नेताज्यूहरूले त देश नै बेच्न खोजिसक्नुभो, तर काठमाडौं महानगर बिक्रीमा छैन। तपाईंहरूले पूरै देश नै बेच्नुभो भने पनि काठमाडौं एक्लै भए पनि नेपाल भनेर उभिनेछ।”
मंगलबार बुढानिलकण्ठस्थित पार्क भिलेज रिसोर्टमा उपत्यकाका मेयर र उपमेयरहरूको मञ्च मेयर्स फोरमको बैठक आयोजना गरिएको थियो। कार्यक्रममा १७ नगरपालिकाका प्रतिनिधिहरू सहभागी भए पनि बालेनले बैठक बहिष्कार गरे।
उनले प्राइभेट कम्पनीबाट आर्थिक सहयोग लिएर आयोजना गरिएको बैठकप्रति असन्तुष्टि जनाउँदै भने, “१७ वटा नगरपालिकाले कुनै प्राइभेट कम्पनीबाट पैसा खाएर बसाएको बैठक बहिष्कार गरेको हो, कसैको अपमान गरेको होइन।”
बालेनले देशको स्वाभिमान र काठमाडौं महानगरको स्वतन्त्रता कुनै पनि निजी कम्पनी वा बाह्य प्रभावमा नपर्नु पर्ने भन्दै आफ्नो कदमको समर्थन गरेका छन्। उनले नेताहरूको क्रियाकलापले देशको स्वाभिमानमाथि नै आघात पुर्याएको दाबी गरे।
बालेनको यो अभिव्यक्तिले सार्वजनिक र राजनीतिक वृत्तमा चर्चा चलाएको छ। कतिपयले उनको निर्णयको स्वागत गर्दै नगरपालिकाको स्वायत्तता बचाउने कदम भनेका छन् भने केहीले यस्तो कडा अडानले समन्वयमा अवरोध ल्याउने तर्क गरेका छन्।
काठमाडौं महानगरका मेयर बालेन्द्र शाहले देखाएको दृढता र स्वाभिमानी दृष्टिकोणले काठमाडौंलाई नेपालको पहिचानका रूपमा उभ्याउने उनको चाहना झल्किएको छ। यो प्रकरणले देशका अन्य नगरपालिकाहरूमा पनि यसबारे बहस जन्माउने अपेक्षा गरिएको छ।
