सिरहा– सिरहा र धनुषा जिल्लाको सिमानामा रहेको पवित्र कमला नदीमा यस वर्षको परम्परागत कार्तिक स्नान विशेष धार्मिक उत्साहका साथ सम्पन्न भएको छ। कात्तिक शुक्ल पूर्णिमाको अवसरमा आयोजित यो स्नानमा स्थानीयवासीसहित टाढाटाढाबाट आएका भक्तजनहरूले नदीका विभिन्न घाटमा पुगेर स्नान र पूजा गरेका छन्।
कमला नदीका उत्तरवाहिनी, सारश्वर, बनिनिया, बसपिट्टा, बरेरबा, फूलबरिया, र इनर्वा घाटहरूमा बिहानैदेखि भक्तजनहरूको घुइँचो लागेको थियो। धार्मिक मान्यताअनुसार कार्तिक स्नानले पवित्रता र शुद्धता प्राप्त हुने विश्वास छ। स्नानपछि धामीझाँक्रीहरूले पहेँलो धोती र सारीमा सजिएर आफ्ना कुलदेवताको पूजा गरी तान्त्रिक विधिहरू सम्पन्न गरे।
स्नानको समयमा गाइने विशेष लोकगीत “भगैत” ले घाटहरूमा अद्वितीय सांस्कृतिक माहोल सिर्जना गरेको थियो। भगैतमा धार्मिक भावनासँगै समाज र संस्कृतिको झल्को पाइने भएकाले यसलाई विशेष महत्व दिइन्छ। उपस्थित भक्तजनहरूले भगैत गायनमा सहभागी भएर घाटको वातावरणलाई झन् उल्लासमय बनाएका थिए।
धामीझाँक्रीहरूले परम्परागत बाजागाजा जस्तै मादल, झ्याली, ढोल-मृदङ, र पिपही बजाउँदै मन्त्रपाठ गरेका थिए। माटोका ढकनामा दियालो बालेर, “जय बीस,” “गोरैया के आसन डोलई छई बाबु” जस्ता मन्त्रोच्चारण गर्दै नदी किनारको परिक्रमा गरेका थिए। यस धार्मिक विधिलाई गंगा र कमला नदीको पवित्रताको प्रतीक मानिन्छ।
कार्तिक स्नानले धार्मिक सहिष्णुता र सांस्कृतिक एकताको प्रतीकका रूपमा स्थानिय समाजलाई एकताबद्ध गरेको छ। यस अवसरमा भक्तजनहरूले धार्मिक कर्मलाई मात्र नभई सामाजिक र सांस्कृतिक परम्परालाई पनि अघि बढाउने माध्यमका रूपमा मनाएका छन्।
यस वर्षको कार्तिक स्नानले सिरहा र धनुषा जिल्लाका घाटहरूमा धार्मिक र सांस्कृतिक विविधता झल्कायो। भक्तजनहरूको ठूलो सहभागिता, भगैतका सुरिलो धुन, र तान्त्रिक विधिहरूले यस क्षेत्रको परम्परागत धरोहरलाई जीवन्त राख्न महत्त्वपूर्ण भूमिका खेलेका छन्। यो परम्परा धार्मिक आस्था, सामाजिक एकता, र सांस्कृतिक जगेर्नाको अनुपम नमूना हो।
