काठमाडौं, मंसिर १ – नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले राजनीतिक स्थायित्व र सुशासनका लागि नयाँ आन्दोलन अपरिहार्य भएको बताएका छन्। माओवादी केन्द्र काभ्रे–काठमाडौं सम्पर्क समन्वय समितिको चौथो भेला तथा प्रशिक्षणको उद्घाटन गर्दै उनले संविधान निर्माणका क्रममा पार्टीले उठाएका शासकीय स्वरूप, निर्वाचन प्रणाली र पहिचानका मुद्दाहरूलाई अघि बढाउन पुनः नयाँ आन्दोलन आवश्यक भएको स्पष्ट पारे।
‘संविधान जारी गर्दा हामीले ‘नोट अफ डिसेन्ट’ लेखेका विषय पूरा नहुँदासम्म देशले राजनीतिक स्थायित्व र आर्थिक समृद्धि हासिल गर्न सक्दैन,’ उनले भने। अध्यक्ष दाहालले आत्मनिर्भर अर्थतन्त्रसहित समाजवादी आन्दोलन थाल्ने प्रतिबद्धता व्यक्त गर्दै सबैलाई आन्दोलनमा साथ दिन अपिल गरे।
उनले माओवादी धारालाई पुनः एकताबद्ध गरी नयाँ अभियान अघि बढाउन सकारात्मक पहल भइरहेको जानकारी दिए। ‘छिट्टै सबै माओवादी धाराहरू एकताबद्ध भएर शक्तिशाली आन्दोलनको सृष्टि हुनेछ,’ उनले भने।
पूर्वप्रधानमन्त्री दाहालले आफ्नो नेतृत्वमा भएका सरकारका उपलब्धिहरू, जस्तै मध्यपहाडी लोकमार्ग निर्माण, गरिब किसानको ऋण मिनाहा, लोडसेडिङ मुक्त देश बनाउने प्रयास र सुशासनका अभियानलाई निरन्तरता दिने पनि उल्लेख गरे।
कार्यक्रममा माओवादी केन्द्रका उपाध्यक्ष अग्निप्रसाद सापकोटाले नेपालले सबै मित्र राष्ट्रसँग समदूरीको सम्बन्ध राख्दै अन्तर्राष्ट्रिय सम्बन्ध सुधारमा माओवादी नेतृत्वको भूमिका महत्त्वपूर्ण रहेको बताए।
