वीरगञ्ज, २ मंसिर।मधेस प्रदेशका मुख्यमन्त्री सतिशकुमार सिंहको नेतृत्वमा २ सय ५१ सदस्यीय उच्चस्तरीय टोली जानकी विवाह महोत्सवको निम्तो दिन भारतको अयोध्या प्रस्थान गरेको छ। आगामी मङ्सिर २१ गते जनकपुरमा सम्पन्न हुने ऐतिहासिक विवाहपञ्चमी महोत्सवका लागि श्रीराम मन्दिरका पदाधिकारीहरूलाई निमन्त्रणा दिन यो टोलीको यात्रा तय भएको हो।
टोलीले शनिबार जनकपुरबाट बाजागाजासहित यात्रा आरम्भ गरी, राति वीरगञ्जमा बास बस्यो। आइतबार बिहान टोलीले रक्सौलनाका पार गर्दै अयोध्या प्रस्थान गरेको हो। अयोध्या पुगेर निम्तोको औपचारिकता पूरा गर्नुका साथै सोमबार श्रीराम मन्दिरमा तिलकोत्सवमा सहभागिता जनाउने कार्यक्रम रहेको विश्व हिन्दू परिषद् जनकपुरका प्रमुख सन्तोषकुमार साहले जानकारी दिएका छन्।
परम्पराअनुसार अयोध्यामा भगवान् श्रीराम र उनका दाजुभाइहरूको सम्मानमा लत्ताकपडा, गरगहना, माखन, दही, च्यूरा, फलफूल, र विविध मिष्ठान्नहरू हस्तान्तरण गरिनेछ। यो परम्परा विवाहपञ्चमी महोत्सवको सांस्कृतिक महत्त्वलाई थप बलियो बनाउन निर्देशित छ।
मुख्यमन्त्रीसहितको टोलीमा गृह, सञ्चार तथा कानुनमन्त्री राजकुमार लेखी, उद्योग वाणिज्य तथा पर्यटनमन्त्री मोहम्मद सकिल मियाँ, श्रम तथा यातायातमन्त्री कौशलकिशोर यादव, र वन तथा वातावरणमन्त्री त्रिभुवन साहलगायत प्रदेश सरकारका प्रतिनिधिहरू सहभागी छन्।
साथै जनकपुरधाम उपमहानगरपालिकाका प्रमुख मनोजकुमार साह, उद्योग वाणिज्य महासङ्घका अध्यक्ष सुरेन्द्र भण्डारी, र जानकी मन्दिरका उत्तराधिकारी रामरोशनदास वैष्णवजस्ता विशिष्ट व्यक्तिहरू पनि प्रतिनिधिमण्डलमा समावेश छन्।
जानकी विवाह महोत्सवले नेपाल र भारतबीचको सांस्कृतिक र धार्मिक सम्बन्धलाई थप मजबुत बनाउँदै आएको छ। प्रमुख साहका अनुसार मङ्सिर २१ गते अयोध्याबाट श्रीरामको जन्ती जनकपुरधाम आइपुग्ने ऐतिहासिक परम्परा अनुसार महोत्सवको मुख्य कार्यक्रम सम्पन्न हुनेछ।
जनकपुरधाममा आयोजना हुने यो महोत्सव नेपाल-भारत साझेदारीको अनुपम उदाहरणको रूपमा हरेक वर्ष झल्किन्छ।
जानकी विवाह महोत्सवले हरेक वर्ष हजारौँ भक्तजनलाई आकर्षित गर्दै धार्मिक पर्यटनको प्रवर्द्धन गरिरहेको छ। यस वर्षको निम्तो कार्यक्रमले पनि क्षेत्रीय पर्यटनलाई थप उत्साहित गर्ने अपेक्षा गरिएको छ।
