काठमाडौं – सहकारी ठगी र संगठित अपराधको अभियोगमा थुनामा रहेका राष्ट्रिय स्वतन्त्र पार्टीका सभापति तथा गोरखा मिडिया नेटवर्कका पूर्व प्रबन्ध निर्देशक रवि लामिछानेमाथि काठमाडौँ जिल्ला अदालतले थप पक्राउ अनुमति दिएको छ।
आइतबार न्यायाधीश शिशिराज ढकालको इजलासले लामिछाने र गोरखा मिडिया नेटवर्कका सञ्चालक छवि जोशीलाई पक्राउ गर्न अनुमति दिएको स्रोतले जनाएको छ। उनीहरूलाई कास्की र रुपन्देही जिल्ला अदालतबाट पनि सहकारी ठगीसम्बन्धी मुद्दामा अनुसन्धान गर्न थुनामा राखिएको थियो।
लामिछाने कात्तिक २ गते कास्कीको सूर्यर्दशन सहकारीको रकम अपचलनको आरोपमा पक्राउ परेका थिए। एक महिना थुनामा बिताइसकेपछि, काठमाडौँको कालिमाटीमा रहेको स्वर्णलक्ष्मी सहकारीको रकम अपचलनसम्बन्धी नयाँ जाहेरीका आधारमा थप अनुसन्धान अघि बढाइएको हो।
स्वर्णलक्ष्मी सहकारीका बचतकर्ताहरूले १ अर्बभन्दा बढी रकम अपचलन भएको दाबी गर्दै जाहेरी दिएका थिए। यसै घटनाको सिलसिलामा प्रहरीको आग्रहमा अदालतले नयाँ पक्राउ अनुमति जारी गरेको हो।
