काठमाडौं।रसुवाको केरूङ नाकाबाट तस्करी गरी काठमाडौं ल्याइएको ३ किलो सुन हराएको घटनामा संलग्न रहेको आरोपमा प्रहरीले चार जनालाई पक्राउ गरेको छ। काठमाडौं उपत्यका अपराध अनुसन्धान कार्यालयले आइतबार विज्ञप्ति जारी गर्दै अपहरण र शरीर बन्धक कसुरमा बुद्धिबहादुर तामाङ (३१), नुर्पु सिंगी तामाङ (३८), टेम्पा नुर्पु तामाङ (४४), र गोपाल तामाङ (४८) पक्राउ परेको जानकारी दिएको छ।
उनीहरूले रसुवाका निमा छिरिङ तामाङ र कन्टेनर चालक रामकृष्ण वाइवालाई असोज ४ गते काठमाडौंको माछापोखरीबाट अपहरण गरी बूढानीलकण्ठको एक रिसोर्टमा बन्धक बनाएका थिए। कुटपिटपछि उनीहरूबाट सुन हराएको विषयमा जानकारी लिने प्रयास भएको प्रहरीको भनाइ छ।
अनुसन्धानका क्रममा रसुवाबाट चीनबाट तस्करी गरी ल्याइएको सुन काठमाडौं ल्याउने क्रममा गायब भएको पत्ता लागेको छ। सुन हराएपछि संलग्न समूहले बन्धक बनाएर कुटपिट गरेको खुलासा भएको हो। प्रहरीले घटनामा थप अनुसन्धान गरिरहेको जनाएको छ।
