काठमाडौं।मधेस प्रदेशका मुख्यमन्त्री सतिशकुमार सिंहले उत्तरप्रदेशको अयोध्याधाममा आयोजित तिलकोत्सव समारोहमा सहभागी हुँदै भारतीय पक्षलाई आगामी रामजानकी विवाहपञ्चमीको निम्तोपत्र हस्तान्तरण गर्नुभएको छ।
मुख्यमन्त्री सिंहले विश्व हिन्दू परिषद् नेपाल धनुषाद्वारा आयोजित उक्त कार्यक्रममा राममन्दिर ट्रष्टका महासचिव चम्पत रायलाई निमन्त्रणापत्र हस्तान्तरण गर्दै नेपाल–भारतबीचको ऐतिहासिक, धार्मिक, र सांस्कृतिक सम्बन्धको चर्चा गर्नुभयो। उहाँले यस्ता परम्परागत पर्वहरूले दुवै देशका नागरिकलाई सांस्कृतिक रुपमा नजिक ल्याउन महत्वपूर्ण भूमिका खेल्ने बताउनुभयो।
यस अवसरमा अयोध्याका विभिन्न धार्मिक तथा राजनीतिक प्रतिनिधिसँग भएको भेटघाटमा मुख्यमन्त्री सिंहले “रोटी-बेटीको सम्बन्ध” थप प्रगाढ बनाउँदै जाने प्रतिबद्धता व्यक्त गर्नुभयो।
जनकपुरधामबाट रामजानकीको विवाहका लागि १०५ प्रकारका सामग्री ल्याएको टोलीले ती सामग्री राममन्दिर ट्रष्टलाई हस्तान्तरण गरेको छ। कार्यक्रममा मधेस प्रदेशका विभिन्न मन्त्री, प्रदेशसभा सदस्यहरू, र जनकपुर उपमहानगरका प्रमुख मनोज साहको सहभागिता रहेको थियो।
सम्बन्ध विस्तारका लागि ऐतिहासिक प्रयास
ट्रष्टका महासचिव चम्पत रायले जनकपुरधाम र अयोध्या बीचको सांस्कृतिक सम्बन्धलाई अझ सुदृढ बनाउन नेपाल र भारत सरकारको सहकार्य आवश्यक रहेको धारणा राख्नुभयो। उहाँले रामजानकी विवाहपञ्चमी जस्ता पर्वहरूको महत्त्वलाई अन्तर्राष्ट्रियस्तरमा उजागर गर्नुपर्नेमा जोड दिनुभयो।
यही मङ्सिर २१ गते जनकपुरधाममा हर्षोल्लासका साथ मनाइने विवाहपञ्चमी समारोहका लागि यो निमन्त्रणाले अयोध्या र जनकपुरबीचको ऐतिहासिक सम्बन्धलाई फेरि एक पटक उजागर गरेको छ।
सांस्कृतिक आदानप्रदानको ऐतिहासिक यात्रा
नेपाल र भारतबीचको धार्मिक र सांस्कृतिक सम्बन्धलाई नयाँ उचाइमा पुर्याउने यो प्रयासले जनकपुरधाम र अयोध्या मात्र नभई, दुवै देशका जनतालाई एकआपसमा जोड्ने सेतुको काम गर्नेछ।
