इसत्याक अहमद रौतहट, ५ मंसिर।रौतहटको चन्द्रनिगाहपुरस्थित गोदावरी स्टिल उद्योगमाथि सरकारी ऋण असुलीमा छलकपट, विद्युत प्राधिकरणलाई करोडौंको बक्यौता नतिर्नु, र श्रमिक अधिकार हननको गम्भीर आरोप लागेको छ। उद्योगले सरकारी बैंक र संस्थाहरुलाई झुक्याएको तथ्य बाहिर आएको छ भने, स्थानीय श्रमिकहरूका अनुसार, उद्योगले नियम कानुनको पालना नगरी श्रमिकमाथि दमन गरिरहेको छ।
नेपाली श्रमिकहरूको स्थानमा भारतीय मजदुरलाई प्राथमिकता दिँदै आएको यो उद्योगले स्वदेशी रोजगारलाई कम्जोर बनाएको आरोप स्थानीयवासी र श्रमिकहरूले लगाएका छन्। नेपाली श्रमिकले उचित रोजगारी नपाउँदा दैनिक विदेश पलायनको संख्या बढ्दै गएको जनाइएको छ।
उद्योगमा काम गर्ने श्रमिकहरूले आफूहरूले उचित ज्याला नपाएको, कतिपयलाई आधारहीन आरोप लगाएर निष्कासन गरिएको, र श्रम अधिकारको खुलेआम उल्लंघन गरिएको गुनासो गरेका छन्। भारतीय श्रमिकलाई समेत समयमा ज्याला नदिने र श्रम कानुनको धज्जी उडाउने घटनाहरू सार्वजनिक भएका छन्।
यद्यपि मजदुर र ठेकेदारले पटक–पटक समस्या समाधानका लागि आवाज उठाए पनि चन्द्रनिगाहपुर इलाका प्रहरी कार्यालयमा हालसम्म कुनै औपचारिक उजुरी दर्ता भएको छैन। तर, स्थानीय स्रोतका अनुसार, उद्योगमाथि यसअघि पनि विभिन्न गम्भीर उजुरीहरू परेका थिए।
उद्योगले कानुन मिच्दै गरेको विषयमा नेपाल सरकार र सम्बन्धित निकायले तत्काल छानबिन गर्न आवश्यक भएको स्थानीय श्रमिक र नागरिक समाजले बताएका छन्। सरकारी रकम र स्रोतको दुरुपयोग, बक्यौता रकम तिर्न अस्वीकार गर्नु, र श्रमिकमाथि दमन गर्नुले कानूनको पालना गर्ने उद्योगहरूलाई पनि असमान प्रतिस्पर्धाको सामना गर्न बाध्य बनाएको छ।
सरकारले यस्ता गम्भीर आरोपमाथि गहिरो अनुसन्धान गरी दोषीलाई कारबाही गर्नुका साथै श्रमिकका अधिकारको संरक्षणका लागि कडा नीति लागू गर्नुपर्ने आवाज उठेको छ।
