काठमाडौँ, ९ मङ्सिर – प्रधानमन्त्री केपी शर्मा ओलीले राष्ट्रिय गौरवका आयोजनामा देखिएका समस्या तत्काल समाधान गर्न निर्देशन दिनुभएको छ। आज सिंहदरबारस्थित प्रधानमन्त्री तथा मन्त्रिपरिषद्को कार्यालयमा आयोजित छलफलमा प्रधानमन्त्री ओलीले अवरोधको पहिचान गरी तत्काल निर्णय लिन सम्बन्धित निकायलाई निर्देशन दिनुभएको हो।
प्रधानमन्त्रीले प्रक्रियागत झमेला, अदालती मुद्दा, ढिलासुस्ती, अस्पष्ट योजना, स्रोतको अभाव र न्यून बजेट जस्ता समस्याको समाधान खोज्न जोड दिनुभयो। उहाँले आयोजनाको उत्पादन र उपयोगसम्बन्धी काम एकीकृत रूपमा अघि बढाउन आग्रह गर्दै ढिलासुस्तीले जनताको अपेक्षामा धक्का नलाग्ने वातावरण बनाउनुपर्ने बताउनुभयो।
“आयोजनाहरु लट्किनु हुँदैन। सपना बाँड्ने होइन, जनताले प्रतिफलको अनुभूति गर्नुपर्छ,” प्रधानमन्त्री ओलीले भन्नुभयो। उहाँले निर्माण व्यवसायीलाई समयमा काम सम्पन्न गर्न र सरकारी पक्षलाई सहजीकरण गर्न पनि निर्देशन दिनुभयो।
स्थानीयवासीका जायज माग पूरा गर्न र नाजायज अवरोधमा सुरक्षा निकायले सक्रियता देखाउनुपर्ने उहाँको भनाइ थियो। छलफलमा २४ राष्ट्रिय गौरवका आयोजनाको वित्तीय तथा भौतिक प्रगति, विद्यमान समस्या र समाधानका उपायबारे प्रस्तुतीकरण गरिएको थियो।
उक्त बैठकमा उपप्रधानमन्त्री विष्णुप्रसाद पौडेल, गृहमन्त्री रमेश लेखक, भौतिक पूर्वाधारमन्त्री देवेन्द्र दाहाल, ऊर्जा तथा सिँचाइमन्त्री दीपक खड्का, रक्षामन्त्री मानवीर राई, खानेपानीमन्त्री प्रदीप यादव, राष्ट्रिय योजना आयोगका उपाध्यक्ष प्रा. डा. शिवराज अधिकारीलगायत उच्च अधिकारीहरु सहभागी भएका थिए।
