काठमाडौँ:राष्ट्रिय विपद् जोखिम न्यूनीकरण तथा व्यवस्थापन प्राधिकरणको कार्यकारी प्रमुख नियुक्तिका लागि दरखास्त आव्हान गरिएको छ। विपद् जोखिम न्यूनीकरण तथा व्यवस्थापन ऐन, २०७४ को दफा १० अनुसार, इच्छुक उम्मेदवारहरूले गृह मन्त्रालयको निजामती कर्मचारी प्रशासन शाखा, सिंहदरबारमा दरखास्त पेस गर्न सक्ने छन्।
सूचनामा उल्लेख भएअनुसार, दरखास्त दस्तुरका लागि पाँच हजार रुपैयाँ बैंकमार्फत जम्मा गरेको सक्कल भौचर दरखास्तसँग संलग्न गर्नुपर्नेछ। साथै, उम्मेदवारले प्राधिकरणको उद्देश्य प्रभावकारीरूपमा परिपूर्ति गर्नसक्ने र सञ्चालनमा नेतृत्वदायी भूमिका निर्वाह गर्न सक्ने कार्ययोजना नेपाली वा अंग्रेजी भाषामा पेस गर्नुपर्नेछ।
दरखास्त फारम गृह मन्त्रालयको विपद् अध्ययन, जोखिम न्यूनीकरण तथा पुनर्लाभ शाखाबाट कार्यालय समयभित्र निःशुल्क प्राप्त गर्न सकिने व्यवस्था गरिएको छ। इच्छुक उम्मेदवारहरूले १५ दिनभित्र आफ्नो आवेदन बुझाउनु पर्नेछ।
प्राधिकरणले नेतृत्वदायी र अनुभवी व्यक्तिहरूलाई आवेदन दिन आग्रह गरेको छ। यस पहलले प्राधिकरणको कार्यक्षमतामा सुधार ल्याउने र विपद् जोखिम न्यूनीकरणमा योगदान पुर्याउने अपेक्षा गरिएको छ।
