बेइजिङ: चीनको चारदिने औपचारिक भ्रमण पूरा गरी प्रधानमन्त्री केपी शर्मा ओली आज स्वदेश फर्कंदै छन्।
प्रधानमन्त्री ओली नेपाली प्रतिनिधिमण्डलको नेतृत्व गर्दै चिनियाँ प्रधानमन्त्री ली छ्याङको मैत्रीपूर्ण निमन्त्रणामा डिसेम्बर २ मा बेइजिङ प्रस्थान गरेका थिए। प्रधानमन्त्री ओली र उनको टोली आज दिउँसो काठमाडौं पुग्ने कार्यक्रम छ।
बेइजिङमा रहँदा प्रधानमन्त्री ओलीले चिनियाँ राष्ट्रपति सी जिनपिङसँग भेटवार्ता गरेका थिए। उनले आफ्नो समकक्षी ली छ्याङसँग द्विपक्षीय वार्ता गर्दै बेल्ट एण्ड रोड सहयोगसम्बन्धी संरचना सम्झौतासहित विभिन्न सम्झौतामा हस्ताक्षर भएको थियो।
प्रधानमन्त्री ओलीले बेइजिङको पेकिङ विश्वविद्यालयमा आयोजित कार्यक्रममा ‘समावेशी लोकतन्त्र: समृद्ध नेपाल, सुखी नेपालीतर्फको यात्रा’ शीर्षकमा मुख्य मन्तव्य राखेका थिए। त्यसैगरी, बुधबार आयोजित ‘नेपाल-चीन व्यापार शिखर सम्मेलन’लाई पनि सम्बोधन गरेका थिए।
प्रधानमन्त्री ओलीको नेतृत्वमा रहेको नेपाली प्रतिनिधिमण्डलमा उनकी धर्मपत्नी राधिका शाक्य, परराष्ट्रमन्त्री डा. अर्जुना राणा देउवा, प्रधानमन्त्रीका प्रमुख सल्लाहकार विष्णु प्रसाद रिमाल, आर्थिक तथा विकास सल्लाहकार डा. युवराज खतिवडा, सांसदहरू, उच्चस्तरीय सरकारी अधिकारीहरू, निजी क्षेत्रका प्रतिनिधि तथा सञ्चारकर्मीहरू सहभागी थिए।
