जनकपुर–आज मार्गशीर्ष शुक्ल पञ्चमीका दिन देशभर भगवान् श्रीराम र सीताको विवाह पञ्चमी पर्व हर्षोल्लासपूर्वक मनाइँदैछ। त्रेतायुगमा मिथिलाको जनकपुरधाममा राजा जनककी छोरी सीता र अयोध्याका राजा दशरथका छोरा रामबीच विवाह भएको सम्झनामा यो पर्व विशेष पूजा, झाँकी र धार्मिक उत्सवसहित मनाइन्छ।
जनकपुरधाममा पाँच दिनसम्म चल्ने महोत्सवका क्रममा मटकोर, तिलकोत्सव, स्वयंवर र विवाह संस्कार सम्पन्न हुँदैछ। राम र सीताको प्रतीकात्मक डोला शोभायात्रा, भजनकीर्तन, झाँकी र प्रवचनको समेत आयोजना गरिन्छ। यस अवसरमा लाखौँ श्रद्धालु सहभागी हुन्छन्। पहिले तिरहुतियागाछीमा मनाइने महोत्सव दुई दशकयता रङ्गभूमिमा विशेष कार्यक्रमसहित आयोजना हुँदै आएको छ।
काठमाडौंको बत्तीसपुतलीस्थित रामचन्द्र मन्दिर, गोकर्णेश्वरको आरुबारी र भूमिस्थलीलगायत देशभरका राम–सीता मन्दिरमा पनि विशेष पूजा र कार्यक्रमसहित महोत्सव मनाइँदैछ। मधेस प्रदेशका मुख्यमन्त्री सतिशकुमार सिंहले पर्वको महत्वलाई अक्षुण्ण राख्दै दीपोत्सव गर्न जनकपुरवासीलाई आग्रह गरेका छन्।
श्रद्धालु भक्तजनलाई होटल तथा अस्थायी आवासमा बस्न आग्रह गरिँदैछ। प्रदेश सरकारले न्यानो लुगा र अन्य सामग्रीको व्यवस्था गर्न पनि अपिल गरेको छ। विवाह पञ्चमीको पावन अवसरले धार्मिक आस्था, संस्कृतिको संरक्षण र समाजमा सहकार्यको भावना अभिवृद्धि गरिरहेको छ।
