विराटनगर ।धरानमा प्रहरीले करिब ७ सय किलोग्राम लागू औषध गाजा बरामद गरेको छ। बरामद सामग्री ओसारपोसारमा प्रयोग भएका दुवै गाडीमा नक्कली सरकारी नम्बर प्लेट राखिएको खुलेको छ। इलाका प्रहरी कार्यालय धरानले बिहीबार पत्रकार सम्मेलन गर्दै मंगलबार राति अमरहाटमा चेकजाँचका क्रममा नियन्त्रणमा लिइएका गाडीहरूको नम्बर प्लेट नक्कली रहेको जनाएको हो।
सुनसरी प्रहरी प्रवक्ता डीएसपी रामप्रसाद तिम्सिनाका अनुसार, पक्राउ परेका बा १ झ ४६०५ नम्बरको स्कारपियो र बा १ झ ५१२७ नम्बरको टाटा सफारीको इन्जिन र च्यासिस नम्बरका आधारमा थप अनुसन्धान भइरहेको छ। स्कारपियो चालक श्यामकुमार विश्वकर्मालाई प्रहरीले पक्राउ गरे पनि टाटा सफारीका चालक अझै फरार रहेको छ।
चेकजाँचका क्रममा गाडी नियन्त्रणमा लिन प्रहरीले चार राउन्ड गोलीसमेत प्रहार गरेको थियो। प्रारम्भिक अनुसन्धान अनुसार, धनकुटाबाट ल्याइएको गाजा धरान हुँदै अन्यत्र लैजान लागिएको थियो।
प्रहरीले यो घटनालाई लागू औषध ओसारपोसारको संगठित गिरोहको सम्भावना भन्दै अनुसन्धानलाई तीव्र पारेको छ।
