महेश सिंह,लहान पुष १३-नेपाल औषधि व्यवसायी संघ, मधेस प्रदेशको दोस्रो प्रादेशिक अधिवेशन शनिबार जनकपुरधाममा सम्पन्न भएको छ। अधिवेशनमा प्रदेशभरका औषधि व्यवसायीहरूको व्यापक उपस्थिति रहेको थियो।
अधिवेशनको उद्घाटन औषधि व्यवस्था विभागका महानिर्देशक नारायणप्रसाद ढकालले गरेका थिए। कार्यक्रममा ढकालले औषधि व्यवसायलाई मर्यादित, व्यवस्थित र गुणस्तरीय बनाउन व्यवसायीहरूको भूमिकाको प्रशंसा गर्दै व्यवसायिक नैतिकता र उपभोक्ताको हितमा केन्द्रित हुने सुझाव दिए।
अधिवेशनले दोस्रो कार्यकालका लागि शिवनाथ सिंहलाई पुनः अध्यक्षमा चयन गरेको छ। संघका पदाधिकारीहरूको भनाइ अनुसार सिंहले अत्याधिक मतका साथ पुनः अध्यक्ष निर्वाचित भएका हुन्। अध्यक्ष सिंहले औषधि व्यवसायीहरूको हकहितका लागि काम गर्दै प्रदेशभर औषधि व्यवस्थापनलाई सुधार गर्न आफू प्रतिबद्ध रहेको बताए।
मधेस प्रदेशका सबै जिल्लाका औषधि व्यवसायीहरूको सहभागितामा सम्पन्न अधिवेशनमा औषधि व्यवसायमा देखिएका चुनौती, सुधारका उपाय र व्यवसायको दिगो विकासका विषयमा छलफल भएको आयोजकले जनाएको छ।
संघले औषधि व्यवस्थापनलाई अझ प्रभावकारी बनाउँदै गुणस्तरीय औषधिको पहुँचलाई सहज बनाउन ठोस रणनीति बनाउने प्रतिवद्धता जनाएको छ।
