महेश सिंह लहान सिरहा- नेपाली कांग्रेसका पूर्व नेता तथा सखुवानन्कारकट्टी गाउँपालिका वडा नं. १ का पूर्व प्रधानपञ्च एंव वाडा सभापति देवनारायण यादवको ९० वर्षको उमेरमा निधन भएको छ। यादवको आफ्नै निवासमा बिहीबार बेलुका करिब ३ बजे निधन भएको पारिवारिक स्रोतले जानकारी दिएको छ।
लामो समयदेखि नेपाली राजनीतिमा सक्रिय भुमिका निर्वाह गर्दै आएका यादव नेपाली कांग्रेसका एक निष्ठावान नेता थिए। उनले पार्टीप्रति आजीवन बफादारीका साथ सेवा पुर्याएका थिए। यादवको निधनले सिरहा जिल्लासहित पार्टीमा अपूरणीय क्षति भएको स्थानिय नेताहरूले बताएका छन्।
नेता यादव केही महिनादेखि अस्वस्थ थिए। निधन हुँदा उनले चार छोरा बिन्देश्वर प्रसाद यादव, गंगा प्रसाद यादव, श्री प्रसाद यादव र गौरी प्रसाद यादवलाई पछाडि छोडेका छन्।
यादवको निधनको खबरले गाउँ नै शोकमग्न बनेको छ। पार्टीका नेता तथा कार्यकर्ताहरूले एक कर्मठ नेता गुमाउनुको पीडाले दुखी हुँदै श्रद्धाञ्जली व्यक्त गरेका छन्।
मृतक यादवको पार्थिव शरीरलाई हिन्दु परम्पराअनुसार शुक्रबार अन्त्येष्टि गरिने परिवारका सदस्यहरूले जनाएका छन्। नेता यादवले आफ्नो जीवनकालमा लोकतन्त्र, समाज सेवा र पार्टीप्रतिको समर्पणलाई उच्च प्राथमिकतामा राख्दै समाजमा उदाहरणीय भूमिका निर्वाह गरेका नाति सन्तोष कुमार यादवले जानकारी दिनु भयो।
